有起有跌，才是人生。
9年前，林欣彤（Mag）參加《超級巨聲2》，經過第17集的比賽，眾望所歸，最終擇冠！大受注目，林欣彤的起步很好，可惜途中不太順利……「我做過3年嘅半獨立歌手，令我明白到好多人情道理，每一個機會，上天可以畀你，亦一下子拎走！」林欣彤說時格外感恩。

撰文：Carrie Yip（carrieyip@msn.com）
攝影：Ronald
髮型：Franco Chung @ Hair Corner （Central）
化妝：Mag Lam
服裝提供：initialfashion

回憶的味道
新界長大的林欣彤，是一個鄰家女孩，只是熱愛唱歌這興趣，把她帶到大舞台，說穿了是命運安排。
可是幾年前，林欣彤因聲帶問題，事業膠着，心情跌至谷底……說着說着如過眼雲煙。「從來，強者都係要經過無數嘅難關，先至可以有成功！當然有啲人有彩數，但唔係一定畀到你。」
今天林欣彤帶我到她的「飯堂」，輕鬆的喝着珍珠奶茶、吃着的鹽焗雞絲飯，十分自在。偶爾老闆娘過來聊幾句，好溫馨的街坊場面。「每星期都會嚟呢度食飯，唔使點諗，價錢又實惠，老闆娘記得晒我鍾意食啲乜，好貼心！佢哋嘅雞飯好好食，溝埋啲秘製嘅豉油嚟食，更加正；個米線湯底好濃郁，幾啱夏天食；佢哋嘅抹香奶茶、珍珠奶茶、台式蛋餅，都唔錯！」林欣彤更謂：「中學時期成日去八號花園嗰間食，依家呢間舖更就腳，所以每次同同學一齊嚟，好有Gathering嘅感覺，好有回憶嘅味道！」
鐵都變鋼
看過林欣彤的新歌《玫瑰式體驗》MV，在「女神光」下的她，十分清新。林欣彤回想那趟到日本拍《玫瑰式體驗》MV，自言是寓工作於娛樂，也是一次美食之旅。
「去日本拍MV，天氣唔算太好，但多謝公司團隊安排，一切都好順利。同埋乘機又可以食好多嘢，譬如鱆魚燒、冬甩、拉麵、海鮮……好有回憶嘅味道。」林欣彤繼續說：「過去失聲嗰段時間，令我成長得最快！講嘢，係一種好基本嘅溝通技能，但嗰陣，要用電話打啲字出嚟話畀屋企人、同事知我想點，其實，好慘嘅！仲令到阿媽好擔心，不停咁樣煲好多雪梨水、陳皮燉雪梨，朋友又送啲蜜糖等等，令我感覺到就算病嗰陣，都唔係自己一個人，要好感謝佢哋嘅關懷同支持！」
沒放棄，林欣彤充滿力量的重新出發，就如《玫瑰式體驗》最後兩句歌詞：「心清亦變得氣壯、火燙令鐵都變鋼！」

茶語
地址：大埔安慈路4號昌運中心地下77號舖
電話：2666 0250
平均消費：約$80/位
泊車：昌運中心停車場
營業時間：07:00-24:00

主持
Carrie葉嘉儀
傳媒人。喜歡「吃」，皆因非只飽足五臟，更可透看人情。