2020年11月24日 

星情飯局 得失也一笑 謝 東閔

2019-04-26 (週五)

初聽無綫現播的劇集《倚天屠龍記》片頭曲《得失一笑中》,是一把陌生又有點熟識的嗓子,哦!原來是謝東閔(Brian)。
入行9年,終擁有自己的第一首歌,謝東閔自言是一件十分興奮的事。謝東閔說:「好多朋友話:『你終於唱番歌!』屋企人亦戥我開心,但呢刻嘅我,先唔會諗得咁遠!」

撰文:Carrie Yip(carrieyip@msn.com)
攝影:David

我是演藝工作者
謝東閔不攀緣的,憶當初,他在《超級巨聲2》得了「梗頸四」(第四名),沒抱怨甚麼,不少「巨聲幫」都以歌手身份進了演藝圈,而謝東閔就以拍劇和綜藝為主!
「自己對唱歌有信心嘅,但我一直唔去強求,不過都會一直去準備,期望唱歌嘅機會嚟。今次當然開心,冇大壓力,因為一路都有練習唱歌。收到呢首歌嗰刻,即刻想嘅係要聽熟啲,嗱嗱聲搵歌唱老師集中式練習,希望出嚟有好嘅效果。《得失一笑中》啲歌詞比較密,有啲地方冇乜呼吸位,高、低音都闊,係有啲難度㗎。」謝東閔喝了一口三色冰,一笑後繼續說:「喺台上唱歌,反而唔緊張,今次入錄音室錄歌,可能係一個半密室嘅環境,會緊張啲,好彩錄嗰陣時,監製Joseph幫咗我好多,令我冇咁緊張,好順利搵到自己把聲出嚟。」
凡事兩面睇,謝東閔現在才有自己的歌,有些人會將他和其他「巨聲幫」比較,覺得他遲了;唱《倚天屠龍記》主題曲,也有網民將謝東閔和當年周華健所唱的主題曲比一比……其實,世代在轉、在變,這樣比只是多此一舉!
「我覺得現今呢個世代,冇話歌手、演員之分,依家多咗渠道去畀觀眾同樂迷去認識到自己,我會覺得稱為演藝工作者啱啲,好多樣嘢都要識,好多時會接觸到唔同嘅嘢,學無先後,我會努力,只希望自己嘅每一把小刀都掂掂哋。」

人生就如朱古力
和謝東閔吃飯聊天輕鬆寫意,他喜歡吃,這也算是他的放假節目之一。
以食物比喻人生,謝東閔告訴我會選朱古力,「朱古力乜味都有,辣都有,喺以前,好多人都估唔到啦!」
「簽番唱片公司,係一個好好亦偶然嘅機會。老闆何生(何哲圖)同我提過市場上比較低沉嘅男人聲,可能就貪我把聲沉沉哋啩,哈哈。不過何生係一個有要求同嚴謹嘅人,佢有提我點樣去唱好啲,我都希望可以盡努力做好啲!踏喺唱歌路途裏邊,當然希望會有一日有自己嘅演唱會。」
歌唱路途屬起步,但論演戲經驗,謝東閔不少,於兩年前《星和無綫電視大獎2017》更奪得了TVB最佳新人獎,近期的《鐵探》,謝東閔便飾演「陳國城」一角。「喺《鐵探》戲分唔係好重,但有得畀我向惠英紅學習,其實係一個好機會,就算未埋位嗰陣,睇佢哋咁有功力嘅演員點去演繹一場戲,對於我嚟講,係一個好大得益!演戲,係要真正融入到個角色,記得祥哥(黎耀祥)同我講過:入行10年可能都同一個新人冇乜分別!更何況我依家入行只得9年,人生經驗唔夠豐富,演戲好多嘢都要靠幻想出嚟。所以,好鍾意聽人哋嘅古仔,或者聽啲前輩嘅分享同教導,呢啲嘢都可以豐富到我嘅經歷。」
工作上,謝東閔一直隨緣,打機打出機會,代表TVB飛到日本等地參加電競大賽,絕對是無心插柳,「我覺得做打機節目嘅主持都好好,其實,打機都係我同TVB幕前幕後一啲同事嘅聯誼活動,所以有得繼續,我當然希望可以Keep落去啦!」
有些苦苦追求也徒然,有些不用刻意經營也變成機會。這,是人生。

mango tree kitchen
地址:元朗朗日路9號形點一期1樓1035號舖
電話:2602 2878
平均消費:約$300/位
泊車:形點停車場
營業時間:11:30-23:00

主持
Carrie葉嘉儀
\傳媒人。喜歡「吃」,皆因非只飽足五臟,更可透看人情。