2020年11月27日 

星情飯局 唔怕醜! 梁嘉琪

2019-02-01 (週五)

應該99.9%的女人都不會喜歡「醜」這個字!
「啲眼眉毛叉開Gel實晒,我受嘅,絕對可以再肉酸啲,但係工作人員話醜得嚟都要貼地喎,所以都算啦。」梁嘉琪(KaKi)一邊吃着天婦羅一邊Show她在電影《你咪理,我愛你!》的造型照給我看……坦白講,夠醜了吧!

撰文:Carrie Yip (carrieyip@msn.com) 攝影:Rico 化妝:Soie lp 髮型:Terrence@HH 耳環提供:SKKY

可以再做更多
《你咪理,我愛你!》是梁嘉琪第一次參與賀歲片的演出,還要是歌舞片,本是演藝學院戲劇學院畢業的她,自言也有一定難度!
「一路我都想演電影,之前做過下,但今次好鬼開心、係最有發揮機會嘅一次,我有兩個剩女造型,當見自己嘅造型,覺得幾『好睇』,哈哈,其實可以再衰啲、醜多啲!呢3幾年,我『演員』呢個身份好似停咗,同王祖藍識咗廿年,佢今次搵咗好多演藝嘅校友嚟拍呢套賀歲片,而我要唱歌、又會同杜麗莎老師同場,幾有壓力㗎,王祖藍要求好嚴格,唔只要唱靚首歌,仲要唱個故事出嚟!」梁嘉琪拍完《你咪理,我愛你!》後,自覺整個人更有動力和衝勁。「我畢業咗15年,嚴格嚟講只係參與過兩次舞台劇。上年拎咗TVB服務10年金牌,我冇諗過自己可以喺一個機構做10年!拎住個金牌,問番自己:『係咪可以再做多啲呢?』自己唔係廿幾歲,有啲人甚至覺得我已經過咗黃金期,但我心裏團火愈嚟愈澎湃,相信會一直係咁燒落去。」梁嘉琪繼續說:「《今日VIP》已經做咗兩年,我諗訪問咗過百位嘉賓,啲嘉賓多數係素人,每一次訪問前都要做足『功課』,佢哋每個人都有唔同嘅故事,我珍惜同每個嘉賓嘅相遇,佢哋豐富咗我嘅經歷。」

面對不同挑戰
綜藝節目、商演,又或Annual Dinner等主持工作,梁嘉琪手到拿來。常有人問她:「時時都係做主持,次次咪又係咁、好似好重複喎!」梁嘉琪覺得:「係,永遠都要度開場白、埋個結尾,但好好玩,喺重複之中搵出新意,先至係挑戰!」梁嘉琪勇於面對不同的挑戰,好像一向愛吃日本菜的她,幾年前卻和友人合作做韓式小食店,試在韓潮中幹點成績,可惜最後執笠結業。
「演藝圈,太多未知之數,所以好多藝人都會搞下生意。但係做生意真係要熟嗰行同埋要瞓身做,咁先至過癮!今次我喺Sola Mall市集推出自己嘅飾物嘅品牌SKKY,有台灣做開首飾嘅朋友幫手,我嘅參與亦好多,SKKY食番“KK(KaKi)”同“Sky ”呢兩個字。每次去旅行,我好鍾意望住個天,嗰刻特別覺得自己渺小!我想透過啲小飾物,畀人將一啲色彩戴上身,SKKY唔會賣得貴,希望學生、OL、靚媽等都負擔得起,大家都開心!」
不只推出個人飾物,梁嘉琪今年還會搞年宵攤位,「張秀文、馮盈盈、鄺潔瑩、湯洛文、張寶儀同幕後工作人員都有份,我哋講咗好多年,終於可以實行,喺觀塘年宵市場擺,賣我哋設計嘅咕臣、風車、地毯等;仲訂製咗啲糖,賣嚟幫一個慈善機構,我哋希望可以做多啲、同個社會多啲聯繫。」
未正式踏入豬年已搞作多多,梁嘉琪的那團火,果然燒得猛!

四季菊
地址:尖沙咀東部麽地道69號帝苑酒店1樓
電話:2733 2933
平均消費:約$800/位
泊車:安達中心停車場
營業時間:12:00-15:00、18:00-23:00

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。