2020年11月27日 

星情飯局 吳若希 這個媽媽真可愛

2019-10-18 (週五)

秋風起,有很多時令食物登場,蟹是其一。
今次和吳若希(Jinny)吃蟹宴,有日本的毛蟹、鱈場蟹、松葉蟹及渡蟹等,極滋味呢!當侍應端上洋葱渡蟹湯,吳若希霸氣的說:「呢個湯,等我清咗佢啦!」然後吳若希一邊吃、一邊笑瞇瞇,眼前的她儼如一個大孩子。

撰文:Carrie Yip(carrieyip@msn.com)
攝影:Rico

愛做主持
日本多種螃蟹,是秋季的美食,也是吳若希喜歡的食物。所以今次的「季節蟹宴菜單」,有10道蟹菜式,確可大快朵頤。
「我對大閘蟹有心理關口嘅,曾經試過連續3日每晚食到3至5隻大閘蟹,跟住飛台灣做嘢,一食嘢就嘔,所以驚咗食大閘蟹。但日本蟹唔同,又鮮甜、啲海水味都好正……」吳若希大讚日本蟹美味,而海鮮類亦是她的心頭好,「我只係唔食牛、唔食羊,怕嗰啲羶味,其實我都好鍾意食嘢嘅。」
剛與森美等到日本拍完第三輯《森美旅行團》,包括不少吃玩買新資訊,吳若希話極好玩。「依家多嘢做,但都係輕鬆嘅工作嚟嘅。拍綜藝節目唔使背稿,自己又鍾意玩,喺過程中又可以識到唔同嘅人喎,幾好!」吳若希繼續說:「《姊妹淘》係我第一個主持嘅節目,嗰陣時乜都唔識,好彩喺呢個節目訓練到點對鏡頭,到依家算係清晰點樣去做一個節目主持。新一輯《姊妹淘》有新拍檔、新資訊,同好多嘅衝擊,我發覺新嘅拍檔有好處,會令我反思、要企喺觀眾角度去諗,呢個節目其實就似一班女人Share自己嘅經歷畀大家。」

痴戀女兒
吳若希享受主持節目,一直以來,節目中亦以最真實一面示人。「自己唔想用腦、鍾意做自己,我亦知道自己唔係好口才,轉數唔算快,所以我啱做主持去「發問」嘉賓。」至於唱歌,吳若希話:「喺以前,每一次上台唱歌都手震、係一個最唔好嘅狀態,緊張多過享受;但依家嘅我,享受到唱歌嘅過程。」
心態轉變,也令吳若希經常笑容滿面,這都要多得她女兒。「我覺得自己愈來愈少朋友㗎,相信我嘅囡囡係我人生導師。好多時,我同囡囡雖然望住同一個方向,但睇出嚟嘅嘢,原來係唔一樣嘅,囡囡畀咗好多開心我,我亦都喺佢身上面學習咗好多嘢。所以平日我會盡量一收工就返去湊囡囡㗎!我個囡囡其實幾好湊,佢畀到一個好好嘅『媽媽經歷』,最辛苦只係餵人奶時期,好多人都有問我會唔會想生番個細佬或者細妹畀佢,我係唔會想將我對囡囡嘅愛分淡或者分薄,所以唔會想再生多個女,如果可以嘅話,反而想生一個阿哥畀囡囡,一齊去錫佢……」說完,吳若希拿起手機看着屏幕上女兒的照片吻了幾下……這個媽媽呢,真可愛!

四季菊
地址:銅鑼灣恩平道28號利園二期G01號舖
電話:2577 0611
季節蟹宴菜單:約$1,880/位,供應期至11月30日。
泊車:利園二期停車場
營業時間:11:30-15:30pm (周一至周五)、11:30-16:30 (周六、日及公眾假期)18:00-23:30(周日至周四)、18:00-00:30(周五、六及公眾假期前夕)

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。