2020年11月24日 

星情飯局 只想與你在一起 菊梓喬

2019-08-23 (週五)

菊梓喬(Hana)首個個人演唱會將於明天開始,所以這個飯局,就是預先為她慶祝。好的,一起要吃好的,當然是菊梓喬喜歡的牛扒。
「牛扒,係我獎勵自己嘅嘢食嚟㗎!」菊梓喬興奮地說。而這天在MEZZO吃的威靈頓牛柳,就是菊梓喬的新歡。

撰文:Carrie Yip (carrieyip@msn.com)
攝影:Rico

不能放棄⋯⋯牛扒
「食嘢」是菊梓喬的興趣。每次一起吃飯,看她真心享受,有時更手舞足蹈,大家也樂在其中。在我認識的女生當中,好牛程度最高的,非菊梓喬莫屬。
曾經菊梓喬決心想戒吃牛肉的,但不久便放棄了。「細個時,牛扒已係我最鍾意嘅食物。有人話如果想達成一個目標,就戒一種你鍾意嘅嘢、會快啲成功!冇理由係唱歌,咁我就揀戒牛啦⋯⋯但好難忍,『唔畀我成功就算啦』,咁我就食番牛嘞!」菊梓喬切了一小件威靈頓牛柳放入口,慢慢的嘴嚼着,十分滋味!
「我嘅生日,亦必食牛扒。我同我阿妹嘅生日好近,我哋會去超市買最貴嗰件和牛返屋企,跟住煎嚟慶祝。近幾年都係咁過、好開心,話就話最貴嗰件和牛,但講出嚟大家可能會笑,只係3百幾咋,不過,喺餐廳食可能會貴好多!煎和牛唔使點調味㗎,五成熟就已經非常好味,我同阿妹都食得好滿足!」曾聽過「十年修得同船渡,百年修得共枕眠,萬年修得姊妹花⋯⋯」,兩個「牛王妹」的滿足,非只是一件和牛,是姊妹之間一直的關愛和支持。

陪同粉絲⋯⋯成長
身型嬌小的菊梓喬,「食力」卻十足,威靈頓牛柳之後再到肉眼,淺嘗了其他美食後,再可加幾口Tiramisu⋯⋯坐在旁邊的經理人也笑說:「Hana每次開工前,一定要有飯落肚!」不過,演唱會在即,菊梓喬也不是每餐都那麼放肆。「我呢排只係用烚、煲、蒸嘅方法去煮餸,戒煎炸、甜,都幾清㗎!」
菊梓喬向來我見猶憐,或者大家都會擔心她在演唱會上的體力問題。菊梓喬蠻有信心地說:「起初都擔心嘅,唱足一晚,要有足夠嘅體力,所以咪去健身囉!希望可以好似演唱會個名『只想與你在一起』咁,嗰晚有好嘅表現,以我嘅音樂畀出多啲正能量,畀到大家美好回憶。」菊梓喬繼續說:「我好支持啲粉絲帶埋佢哋父母一齊嚟㗎,等啲父母都知道我係乜嘢人,我當係一個姐姐身份,希望可以同化佢哋,一齊正面啲,一齊向善!」心善的人,格外漂亮,一切也會愈順⋯⋯菊梓喬就是人辦。

MEZZO
地址:尖沙咀麼地道71號一樓
電話:2313 8778
平均消費:約$380/位
泊車:安達中心停車場
營業時間:12:00-15:00、18:00-23:00

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。