2020年11月27日 

星情飯局 健康述素 黃子恆

2019-01-04 (週五)

最近大家都對豬肉起戒心!其實,不時都有類似的新聞爆出,所以吃素可能較安全。
圈中茹素的不少,男演員黃子恆(Hugo)是其中一個,他說:「我屋企信道教,喺幾歲嗰陣,我同阿媽講唔食肉,覺得殺雞殺鴨好殘忍,跟住有一排冇食肉!大個之後,戒咗牛肉,每逢初一、十五食素,然後久唔久一段時間又唔食肉,當係鍛煉⋯⋯呢年,又同屋企人夾埋一齊食素嘞!」

撰文:Carrie Yip (carrieyip@msn.com) 攝影:Ronald

食個齋飯盒
每逢農曆1月,是筆者的全素月,即將邁向第8年了,個人經驗:有伴吃素,是比較容易堅持下去。
「幾年前,試過一年唔食肉,只係食綠色嘅菜,但係飲食唔均衡、好唔健康,後來變番食菜加海鮮。早排屋企人話:『不如齊齊食素囉!』我覺得都唔錯吖,同埋又可以幫身體嚟一次Restart喎,咁就開始咗!依家食素易好多,愈嚟愈多餐廳都有全素嘅Menu,我如果外景開工嗰日,只要早啲同劇務溝通好,佢哋就可以安排個齋飯盒畀我。同朋友食飯,就算真係好難點菜,我咪食『碟邊素』囉,唔使大家去遷就我,同埋唔好搞到食素係咁複雜嘅一件事,所以飯局應酬,都OK嘅!」黃子恆間歇性全素、戒肉,加上有家人陪伴,吃素無難度,他提醒一些素食初哥:「要知道啲食物應該點樣食、點配搭,就可以『素得健康』;有啲人想食素又擔心吸收唔夠蛋白質,其實食素比食肉類更加安全、健康,因為冇咁多激素嘛!」
全家人一起吃素開心,但家中Menu自然要改改,「我一個人住,唔鍾意出街食飯,自己會喺屋企煮,屋企人生日,我就會做一啲主題嘅菜式,譬如日本嘢、土耳其嘢、西班牙嘢,都係我親自下廚,咁多菜式之中,屋企人覺得我煮嘅西班牙海鮮飯最好食!」沒質疑黃子恆的廚技,但一家人聚在一起,吃甚麼也分外美味。

都怕被定型
看黃子恆的外表,相信大家想不到他會愛下廚、會為家人做生日飯!
黃子恆放下手上的素菜漢堡,認真地說:「我都明嘅,一直演嘅角色,都好似做反派居多,自己都怕會被定型,我明白有時做奸角會易出位、雖然依家啲觀眾好聰明,但係如果長期都係做反派,長期將人性陰暗面放大,如是者做得多,令自己又處於咁嘅負面狀態,連情緒都會影響埋,好易諗埋一邊!」
演員往往是被動的。「所以好多謝編劇同導演,畀我演《是咁的,法官閣下》嘅賴澤明,佢係一個務實嘅男人…….喺以前,我會希望個角色造型靚啲,梗係着晒西裝Gel靚個頭啦,但今次會考慮呢個角色都忙到死,仲邊有時間咁姿整?於是我咪用五指梳去梳個All Back頭,整整齊齊就算,嚟強化個角色嘅性格。」於剛拍完的《機場特警》,黃子恆所飾演「章振赫」頗正面的,他感恩的說:「體力上要求好高,好在本身鍾意做運動,一有空檔就去健身,呢次令我開始深入了解到健身係好專嘅學問,食嘢要控制,做每個器械都有唔同效果,亦要有適量嘅休息配合,唔係狂操就得!喺劇中算係班特警嘅前輩,事實上我喺呢一行都唔係新人,不過仍然喺爬嘅階段,跌跌撞撞之間,好多謝公司畀嘅機會,要努力、要珍惜!」做好自己,祝福黃子恆!

御花園卜咖啡室
地址:銅鑼灣怡和街88號富豪香港酒店1樓
電話:2837 1772
平均消費:約$250/位
泊車:怡和街68號地庫停車場
營業時間:06:00-23:00

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。