2020年11月24日 

明抽暗寸 Hebe 牀單Look掀熱話

2019-05-06 (週一)

圈中經常發生時裝車禍,好似品味獨特嘅鄧紫棋同黃宗澤就係公認嘅「炒車」表表者嘞!但估唔到今次連「台灣女神」田馥甄(Hebe)都失手!事緣Hebe前晚喺「春吶」音樂節壓軸登場,現場觀眾固然High爆,但騷後網上最熱烈討論嘅居然唔係佢美妙嘅歌聲,而係佢身穿嘅七彩連身裙,皆因唱到一半時,Hebe一張開雙臂即「驚」現大片鬱金香,有網民就發現呢個Pattern同網購嘅牀單一模一樣,搞到「田馥甄牀單造型」瞬間成為熱搜,好彩Hebe EQ高,噚日亦喺社交網幽自己一默:「仔細看我牀單(衣服),俺是別有用心特別帶着兩『快樂』給您們啊!大家快樂就好。」順利化解呢場公關危機。