2020年11月27日 

明抽暗寸 林盛斌 捐精幫補家計?

2019-01-30 (週三)

林盛斌(Bob)出名係圈中多「產」藝人,要養活一家六口真係一啲都唔易,仲要早排被「逼遷」,趕喺農曆新年前搬去九龍塘嘅新居,夾夾埋埋都使唔少錢!卒之,佢噚日喺社交網上載咗一張捐精合格證書,留言:「呢期搬屋使咗好多錢,出面個市又好靜,真係冇晒辦法,諗咗好耐,噚日終於去咗,都好,執番啲,夠交呢兩個月啲水電煤……」相中顯示,Bob捐獻咗10次,獲得捐獻補貼5,000蚊同慰問金1,000蚊,搞到一班圈中好友同網民都忍唔住問真定假?事後Bob就話只係Key圖玩吓咋,仲抵死咁話:「希望唔使去到呢步,但如果都係白白用咗喺張紙巾度,真係有收入的話都係好事嚟。」