熱話 時尙 食玩 生活 旅遊 娛樂 親子 專欄 着數

成功靠苦幹 林秀怡

2019-07-05 (週五) 08:00 上午

年輕人創業事迹多的是,不過十居其九靠「父幹」,要是沒有富爸爸又非名校出身,做任何事就更加注定輸在起跑線上!但事實真的如此嗎?未必!
年僅28歲的林秀怡自小家貧、父母離異,因此10多歲便投身社會,立志給媽咪更好的生活,即使入行後,她仍身兼多職做侍應、電話接線生、賣避孕套,落力搵銀!終於在前年2月,靠一雙手打拼的林秀怡正式榮升老闆娘,與友人於旺角開設意大利麵餐廳“FooDo ”,她笑言:「依家都慢慢上軌道,希望賺到啲錢,喺港九新界18區都開一間,好似譚仔咁!」不過,當前除了做好餐廳與幕前工作外,更重要的是照顧好患病的林媽媽。

撰文:黎寶倫
攝影:陸羽勝

成長於單親家庭的林秀怡,8歲起便跟媽咪相依為命,家住天水圍公屋。中五畢業後,為幫補家計先於超市做收銀員,至08年才加入無綫電視藝員訓練班,默默苦幹11年,近年終於憑人氣劇《不懂撒嬌的女人》、《婚姻合伙人》等嶄露頭角。雖然捱到今日人工都只得萬幾蚊,但全靠死慳死抵、日打兩三份工,兩年多前她終於儲得一大筆錢,與閨蜜合資於旺角女人街開設餐廳“FooDo ”,一嘗做老闆的滋味!
烏花瓶
事實上,私下甚少下廚的秀怡鍾意食多過煮,亦從沒想過開食肆,只是剛好藝訓班同學葉婷芝與老公打算開舖,於是她提出夾埋一份當投資,以支持自己的演員夢,「慶幸佢肯畀我參一腳,落嚟做吓花瓶,如果第時真係做唔成演藝圈,咁呢度就係我嘅後花園,等我落吓嚟做嘢。」
廚藝未及拍檔精湛,平日又要兼顧幕前工作,秀怡惟有閒時充當公關及打雜,「拍檔好信得過我,有時我唔落嚟都唔會詐型,因為佢哋好明白演藝圈份工真係好冇定時,我亦都100%相信佢哋,所以好少理呢度、好少畀意見,始終食嗰方面佢哋嘅味覺敏感好多,我最好就坐喺度聽指示,勞力方面就最有信心,最叻係洗碗!」而現時,本來主力負責樓面的她亦開始學整薄餅,原因居然是遭拍檔「嫌棄」,故意將她收埋,「我返呢度嘅時候真係好樣衰,因為通常都係一起身、唔化妝就過嚟,塊面油淋淋,好烏,咁佢哋就話試吓畀我做廚房啦,依家都慢慢學緊。」秀怡哈哈笑道。
幸福滋味
有別一般西餐廳,FooDo最大特色是Pasta、Pizza全自家手製。為保留食材的原汁原味,店內堅持不添加味精及多餘調味料,選用日本優質麵粉、雞蛋等,並於每朝新鮮製作。說到團隊日日身水身汗搓麵粉,原動力必定是來自食客的讚賞,「有次食客特登走入廚房讚好食,仲話好耐冇食到呢種幸福感。嗰種滿足感係開心、感動嘅,我哋都希望賺到啲人開心嘅感覺,有時都會出嚟同啲客傾偈,啲熟客都好似朋友咁,甚至之前有報道講我媽咪,佢哋見到我都會細細聲講加油,其實嗰陣每一句加油都令我勁想喊。」語畢秀怡已雙眼泛紅。

好景不常,當事業漸入佳境,去年林媽媽卻確診患上子宮頸癌。面對突如其來的巨變,本來身兼兩職的秀怡霎時間仲要照顧埋媽咪,想必很吃力吧?她哽咽道:「我啲Partner真係好好,嗰時媽咪一有事,佢哋就叫我完全唔使理呢度、即刻去照顧媽咪,跟住我就放低幾個月畀佢哋管理。好多人話同朋友夾錢開舖會傷感情,但我哋真係冇,仲好似家人咁。」
親情第一
一直以來母女情深,愛錫媽咪的秀怡為了給予對方更好的生活,17歲便開始投身社會努力搵錢,不單止試過日以繼夜、夜以繼日打兩份工,搞到體力透支「昏迷」家中,還一度拋開藝人包袱賣避孕套,「賣嗰啲好容易㗎咋!我覺得人生就係咁㗎啦,唔需要諗得太執着,或者太複雜嘅嘢我都唔鍾意。」她豁達地說。
經歷大病後,從前急於「上車」的想法亦有所改變,秀怡認為與其做「樓奴」,倒不如活在當下,珍惜與媽咪相處的光陰,「如果要買間啱自己心水嘅靚屋又真係難,因為媽咪都60歲,可能Touch Wood我得20年努力,假設好彩啲10年就儲到錢,嗰時媽咪都已經係老人家嘞,咁不如趁佢依家仲行得走得,帶佢去多啲旅行、得閒去高級餐廳享受吓,總好過我完全冇時間陪佢,等佢70幾歲先畀間屋佢,我覺得媽咪想要陪伴多過間屋囉。」對她來說,現時錢銀並不是最重要,只要開開心心、媽咪健康便足夠。
加油呀,林秀怡!

FooDo

地址:旺角通菜街1A-1L號威達商業大廈地下C號舖
電話號碼:9016 6327
營業時間:星期一至日12:00-15:00、18:00-22:00