2020年11月26日 

情懷不老 林子祥

2019-04-26 (週五)

人與人之間的溝通應該是直接的,而不是依賴冷漠的互聯網,仍然堅持用2G手機的林子祥是這樣認為,所以他跟身邊人有更多心靈上的接觸,更豪言:「我都唔使上網嘅,反正我有好多朋友同粉絲會幫我搵我想要嘅資料,我哋會傾電話聯絡,保留好直接嘅溝通方式,人與人溝通唔可以冇晒感覺。」
就是想喚醒人與人之間的感覺,林子祥(阿Lam)以《憑着愛》作主題,將於5月3日至7日在紅館舉行《林子祥 Lamusical 2019 演唱會》。一向予人沉默寡言的阿Lam,是日滔滔不絕的說着其構思了兩年,將他膾炙人口的歌曲混合電影、MV、舞台元素的歌劇演唱會,用歌曲帶出生活、友情與愛情。
觸動人心
「咁多年嚟每一次唱《追憶》就會諗起我Daddy,唱《最愛》就諗到結婚同離婚嘅事,每首歌都有我喺入邊,亦都有你喺入邊,因為成日喺街都會有人同我講,聽你嘅《誰能明白我》同《莫再悲》係佢哋人生最低潮嘅時期,令我感受到佢嘅唔同嘅階段,都有我嘅歌陪住佢哋。」阿Lam說。
的確,能觸動人心而又引起別人共鳴的歌,阿Lam的歌聲是無庸置疑,「自己都觸動唔到,點可以觸動到人,我唱每首歌都係從心出發,亦都代入咗自己嘅故事,咁當然曲同詞都好緊要,以前嘅歌隻隻都好到用㗎。」問到有否留意現時新世代歌手的歌?阿Lam坦言:「咁有時去表演都會有其他歌手,都有聽過,不過依家啲歌都講唔到深入嘅嘢,我聽唔明㗎,一聽就覺得又係咁樣,都冇表達到啲咩,至少應該要搵到一啲嘢真係想講,又配合音樂同詞,先聽得入耳。」
音樂講古佬
對於現年71歲的阿Lam來說,這個演唱會絕對是一個大挑戰,每一個細節他都比以往參與更多,從故事、選角、舞台設計、燈光及歌曲編排,「今次好似拍戲咁,用歌去砌劇本,自己好似做咗一個音樂劇嘅導演。」阿Lam表示在演唱會中自己會化身成一位音樂講古佬,並找來兒子林德信、小肥與胡琳3位年輕歌手演繹這個歌劇,「對我嚟講真係大挑戰,對佢哋3個都係,又要唱歌又要做戲,我唱咗50年歌,用50年嘅音樂,又可以同班年輕人合作、用盡我嘅歌嚟完成一件事,係好值得做嘅。」
一個對阿Lam來說如此重大的Project,又點可以少得老婆葉蒨文(沙麗)呢?原來當初他是想以自己和沙麗的歌曲串連這個音樂劇,不過愛錫老婆的阿Lam,知道對方要照顧年邁的母親,根本分身不暇,「佢每日都要去醫院照顧媽咪,都唔想佢咁辛苦,不過佢聽到我有呢個Idea,就已經好興奮,都好支持我,所以佢就喺幕後做我個傳聲筒啦,大家都知我唔鍾意講嘢嘛。哈哈!」阿Lam還指沙麗比任何人都熟悉他的歌曲,由對方為其音樂及舞台整理各種細節位,無人能及她如此細緻。