2020年11月27日 

悲喜中的成長 林二汶

2019-07-03 (週三)

你有多久沒打給朋友了?見面時又可有用心聆聽他們的想法?很可悲,當資訊科技日趨發達,你以為跟親友的溝通愈來愈多,但事實上,一切交談就止於文字和Emoji。
「有句Quote寫得好好,有唔好嘅事發生,你會問點解發生喺我身上,但你應該問呢件事教緊你乜嘢。」林二汶說。去年,她痛失一位「超友誼」閨密──盧凱彤,全賴一班好友互相療癒,令她發現從一個極致悲傷中能找到極致的幸福,亦使她更珍惜與親友見面、共處的時光,「喺Social Network睇到嘅嘢係好片面,我都唔會將自己近況Update上去,因為我知道關心我嘅朋友係會約我,如果佢想見我,我都一定會喺度。」

撰文:黎寶倫|攝影:fr3d3r1ckl4u|場地:RedMR紅人派對

誰說娛樂圈中沒有真朋友?向來人緣極佳的林二汶則笑謂:「咩地方搵真正朋友都難㗎啦,唔關個圈事,其實歌手之間冇話爭唔爭,起碼我感覺唔到,可況我又唔係咩新鮮蘿蔔皮,有咩好爭啫!」入行18年,與不少藝人、合作夥伴都變成知己的她,早前更找來RubberBand主音6號(繆浩昌)合唱新歌《超友誼》,將這份「超出家人關係」的好友情誼唱出來!
其中一句歌詞:「失戀失憶失意,望到你就冇事。」當遇上煩惱時,二汶又會否找好友傾訴呢?她卻謂:「其實我好少講煩惱,除非真係完全解決唔到先會呻,但我好少遇到,通常都會問自己先。」皆因她認為呻完對件事都冇幫助,頂多只會搵朋友「飲嘢」消愁,又或者找哥哥林一峰充當「出氣袋」。
愛無界限
數到最「超友誼」閨蜜,除了岑寧兒外,無容置疑,情同姊妹的at17拍檔盧凱彤(Ellen)必定排第一,「我哋嘅友誼無論乜Form都係一樣,我信真正愛嘅關係唔止於肉身,亦唔需要特別去記住,因為嗰樣嘢留咗喺你身體裏面。」提到Ellen去年8月忽然離世,眾親友互相扶持辦理身後事,「當時我哋係一班人經歷一個悲傷,但因為我哋有大家,令我明白朋友嘅陪伴係要好好珍惜。嗰時大家唔會特別講,因為你好傷心嘅時候根本形容唔到,身邊嘅人明白亦唔會多問,例如大家食飯,有人食唔落就唔會逼人食,有人想喊就行埋一邊喊,喊喊吓講笑嘅講笑,嗰個先係真正嘅陪伴。」
二汶又罕有地剖白心情,「我答應咗會好好咁生活。其實人人都會經歷生離死別,作為一個過來人,亦係經歷中嘅人,我想話畀大家聽,每一個好大嘅悲傷背後,都會令你體驗好大嘅愛。」又如動畫《玩轉腦朋友》所說,悲與喜是人生必經,亦是缺一不可的。
常在左右
事件令她更珍惜與友人相處的日子,眼見現今大部分人連聚會都只顧篤手機,二汶則籲大家放低電話、學識不靠社交平台了解朋友近況,「我每次同佢哋一齊都好In the moment、好專心,希望佢哋感覺到我嘅Presence同真心真意,而唔係撳緊手機等你陪我食飯、等我冇咁悶,我係真係想同你傾偈。」在朋友堆中,二汶亦經常扮演「樹窿」的角色,問Ellen可曾找她訴苦?「我唔想講太多佢嘅病,因為冇腦分泌失調嘅人係唔會明,我對呢件事嘅體會係,我了解我唔了解,我明白我唔明白。」
那麼如何幫助抑鬱病患者呢?最好的方法就是尋求專業人士協助,「對於自己或朋友遇上情緒問題,你必須要知道你哋唔係孤單嘅,好多人都面對緊同樣嘅問題,作為身邊人最大嘅愛係『明白自己唔明白佢經理緊咩痛苦』。」而遇上傷心的人,她又奉勸各位:「千祈唔好講『唔好唔開心』,你應該同佢講『OK㗎你唔開心,有我喺度,但要記得唔開心係可以停。』,其實人到最後都係想畀人明白、聆聽啫,個問題根本唔重要。」