熱話 時尙 食玩 生活 旅遊 娛樂 親子 專欄 着數

徐燦傑##非分熟女的「遐想」

2019-04-12 (週五) 08:00 上午

多謝英皇電影林兄弟的邀請,能夠欣賞一套自己期待萬分的電影《非分熟女》,肯定要捧場支持!首映日子係4月1號,場館水洩不通,好難怪,正因為呢套電影引起好多好多迴響,亦係蔡卓妍(阿Sa)不斷喺演技上、形態上,一次又一次咁追求突破!佢喺演藝事業上不斷蛻變求生,最終又一次取得成功,實在為前輩Sa爸感到驕傲!
或者,有好多朋友會認為睇阿Sa 首次「全裸演出」係一個賣點,呢個固然係電影亮點之一,但唔好忽略阿Sa嘅演技,今次係作出更深層次嘅發揮!佢將都市人嗰份含蓄,同時對靈慾嘅渴望,演繹得相當細緻!電影列為三級片,令到好多觀眾卻步,但呢部電影確實唔係「為三級而三級」!三級片嘅情節,將整個故事嘅流暢性變得更加自然!男主角吳慷仁,因為之前拍咗五月天嘅MV《終於結束的起點》,人氣毋庸置疑,配合佢嘅「鬼佬廣東話」,令男主角嗰份浪子氣質,與期望傳承尋根嘅矛盾特質表露無遺!
呢套電影,交代咗一間家族餐廳的傳承,亦都同時交代「父與女」嘅感情線缐,令我諗起另一套電影《每當變幻時》,楊千嬅同馮淬帆所演繹出嚟嗰種父女默契同親情。而喺《非分熟女》入面,阿Sa就將呢一份光芒傳承!
今日,如果我話英皇電影係電影娛樂嘅「班霸」,相信冇人否定!每一套電影喺市場定位及布局,都彰顯心思,雅俗共賞嘅境界不能言喻!楊受成博士精心打造嘅娛樂企業,配合兩位千金楊諾思及楊玳詩,喺珠寶、金融證券上各領風騷,加上兒子楊政龍堅守房地產業務,令英皇集團整體嘅「合縱連橫」更顯優勢!楊家精神,各司其職,猶如一部四頭馬車邁步前進,學我偶像星爺話齋,實在係「冇得頂」!期待英皇未來有更多優質作品出現!

徐燦傑  (逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!