2020年11月25日 

徐燦傑##私募基金的投資藝術

2019-08-30 (週五)

自從轉型成為美國私有基金合夥人之後,我見嘅嘢比以前多,睇嘅嘢亦比以前廣,走動嘅地方,正如我先前所講,都喺亞太區「來來回回」!其實由去年中開始,已經同好多身邊朋友講,香港要重新思索以前嘅定位——以前係「亞洲四小龍」,而家可能只係「小蟲」,因為近年韓國都已經崛起!香港市場重新定位,其實係源自一個最古老嘅講法,就係一個市場不對稱嘅信息,帶動番香港人嘅價值!
私募基金(Private Equity)呢個名字,其實比好多唔同嘅金融朋友濫用咗,甚至攞住證監會9號牌,就當自己做私募基金,真係畀佢吹脹!又好難怪嘅,私募基金永遠戴住一幅神秘嘅面紗,例如同國內朋友閒談,佢哋都視之為理想行業!
我覺得一個成功嘅私募基金,其實唔係投錢咁簡單,喺搵到好項目以外,能夠為呢個項目創造更多優質價值!近排見到好多老闆,佢哋本身喺行業上嘅認知同深度知識,基本上係無人能及!一個會計或財務嘅朋友,都係咁叫公司點樣增加收入,減低成本咁,其實呢啲都可以叫做專業嘅常識,英文叫做Professional common sense !
以前嘅年代,我哋為咗搞金融去做業務,但唔少朋友未必識得睇住一項業務,基本嘅公司管理運作、甚至係相關學科知識,其實係非常重要!當然,實戰經驗亦都唔係話讀書可以攞到!所以做PE嘅朋友,基本上都係由產業開始,然後透過自己對一個產業嘅認知,尋找好嘅投資項目,到最後先透過唔同嘅金融工具或者平台,將項目嘅價值更加突顯!
作為土生土長嘅香港人,更加睇到亞太區係香港值得投資同發展嘅橋頭堡!我亦相信將來香港人唔再需要完全背靠祖國,可以借新興產業重新崛起!,而家好多大學已經將重點放返喺亞太區嘅管理戰略,文化管理!相信我哋香港人除咗去亞太區旅遊以外,亦能夠視之為拓展業務嘅起步點!
做咗私募基金之後,見到好多唔同嘅投資項目,真係千奇百怪,新奇有趣,但係最開心係認識咗一班新戰友!正如我所講,金融市場都需要有聯盟(Alliance ),要成功,共享嘅概念係唔可以忽視!
有人話私募基金好神秘,下次再同大家慢慢交代私募基金嘅真實運作!

徐燦傑  (逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!