2020年11月24日 

徐燦傑##《淪落人》的啟示

2019-04-26 (週五)

作為一位娛樂經濟學嘅專家,欣賞一位演員,就從來不會與其政治取向扯上關係,只管做到中肯的評價!自己一向好喜歡黃秋生嘅演出,由以前大奸大惡、賊眉賊眼,「見到都想打鑊佢」,到近年經過時間沉澱之後,佢將每一個角色(近年較多在舞台劇上)嘅演繹、甚至喺廣告嘅演出,都能夠隨心所欲,演技可謂無微不至!
真心支持香港電影,雖然同期猛片如雲,但能夠觸動情感嘅電影,就一定要支持!好像之前嘅《五個小孩的校長》,就令到好耐無流眼淚嘅我,霎時熱淚盈眶!至於由影帝秋生哥主演嘅《淪落人》,亦同樣擁有呢份神奇感覺,但導演高明之處,在於嗰份淡淡然嘅自處,只有用心領會,先至能夠感受到嗰份「不能言喻」的感情!女主角Evelyn Santos嘅演技固然驚喜,最佳新演員實至名歸!至於李璨琛嘅特別演出,同樣為電影帶來不可或缺嘅元素!電影嘅重點,在於喺這個分化社會中,所有立場必須兩極化之間, 創造咗一份和諧! 不為煽情而煽情、不為立場而固執,甚至過分得去到一個無可爭議的「愚孝」,《淪落人》將呢份感情提升到極致!
中港經濟互通,已經係我哋生活上不能分割嘅現實!中國市場龐大,無疑對娛樂事業有一定程度嘅「催化」作用!不過,我仍然認為,香港嘅電影製作,可以重新喺本土文化嘅基礎、以及獨有嘅社會意識之下,帶動整個中港電影產業發展!正如我先前所講,回歸基本(Back to basic) ,香港電影獨有主題,唔係用特效可以做到,與其羨慕人哋大製作、大堆頭嘅時候,點解我哋唔可以回歸基本,用真摯嘅情感,將電影嘅魅力好好演繹,重新改寫中國電影市場嘅發展!
秋生哥做到咗,陳小娟亦成功行咗第一步喇!下一步,就要好似發哥喺《無雙》入面話齋,喺一個屬於自己嘅舞台上,你想點都得啦!香港演員及製作人們,畀心機,香港電影需要你哋!

徐燦傑  (逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!