2020年11月26日 

徐燦傑##水星逆行月#市場大混亂?

2019-07-05 (週五)

Prof J:今日再請嚟我嘅好朋友騏騏,為大家以玄學角度分析大市走向。喺5月3日,我哋曾經喺度講過,「五窮月」股市暗藏危機,果然不出所料,恒指5月累積跌幅達9.4%。而中美貿易戰6月又似乎有緩和迹象,因此「六絕月」就無發生。剛踏入7月,你不如又同讀者分享吓對後市嘅睇法啦!
騏騏:今次會以天星角度去讓讀者理解箇中情形。有兩個現象值得注意,分別係水星逆行及日月蝕之現象。水星逆行將於7月7日到8月1日發生;而日全蝕及月偏蝕,分別喺7月3日及7月17日發生。
Prof J:日月蝕我都聽過,但水星逆行又係咩事呢?呢啲天象對股市又有乜嘢影響呢?
騏騏:天體系統內嘅行星,通常以逆時針方向運行,而水星逆行並非水星實際上反向運行,而係由於水星運行軌道與地球公轉,喺黃道上產生角度差,帶來視覺上軌迹嘅改變。
Prof J:「上有所好,下必甚焉」。你一向所講嘅中西玄學堪輿文化概念,皆源自天球行星不同運行軌道之引動力,同時亦對地球上人類思想及行為帶嚟直接影響,從而反映到投資市場出現價格波動上落,可以話係集體意識嘅「恐」與「貪」,帶動住市場方向!
騏騏:全中!太陽主宰一切陽性事物,例如統治者、領袖、男性、父親、外在的個性等,而月亮則主宰一切陰性事物,例如升斗市民、女性、母親、內在情緒等。以天星角度,日月蝕是指陰陽失調現象,導致地球引力失衡,從而產生各種凶象如地震等。當然,實際情況要視乎日月蝕所落嘅宮位,以及其他星體嘅排列與構成之角度,而有所改變!
Prof J:喺古代,人類形容日蝕月為天狗蝕日月,都視為凶象。雖然日月蝕同埋跌市好難直接視為因果,但聽你分析,呢個月市場有震動亦係在所難免!
騏騏:呢個只係上集,好戲仲喺後頭,呢個月又同時出現「水星逆行」現象。水星主智慧,掌管一切流動嘅嘢,例如個人思考模式,學習及表達能力,而喺生活上會影響到運輸、航運和電訊網絡、資訊流通等。喺水星逆行發生時,各種流動性會出現障礙。喺投資市場上,如果大家喺買賣過程中思路不清晰,判斷力會降低,市場就容易出現混亂。而根據過往數據,大部分股災都發生喺水星逆行嘅時期。
Prof J:聽完你嘅解釋,睇嚟7月未有得翻身之際,仲要扣好安全帶!

徐燦傑  (逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!