熱話 時尙 食玩 生活 旅遊 娛樂 親子 專欄 着數

徐燦傑##從學友談到醫療科技

2019-01-25 (週五) 08:00 上午

香港樂壇四大天王,相信到而家呢一個年代,仍然係無人不曉!正如我先前所講,因為喺中國呢個咁龐大嘅音樂市場,佢哋正正缺乏咗類似香港八九十年代嘅黃金盛世!所以喺互聯網嘅音樂世界,為以往嘅每一位歌星累積寶貴資產,成為音樂傳承嘅重要鎖匙!
啱啱同我舊公司嘅老闆,欣賞咗張學友(圖)嘅演唱會,其實之前喺香港嘅時候,已經同佢睇過一次,但佢呢位忠心粉絲話,就算幾忙今次都要再睇!佢話,學友每一首金曲都陪住佢成長,所以睇演唱會嘅投入程度,簡直好似一個小粉絲咁瘋狂!學友作為「歌神」,基本上聽佢嘅演唱會,同聽佢嘅CD係冇乜分別,完全可以用「零瑕疵」嚟形容!當然佢喺舞台上嘅「聲色藝」,係聽CD欣賞唔到嘅!我呢位舊老細早排都有睇華仔演唱會,佢就覺得兩個演唱會各有千秋,而華仔個演唱會就比較接近一個嘉年華、好似同老朋友嘅聚會一樣!
學友哥雖然已經57歲,但對佢嚟講根本唔重要,全因佢嘅生活作息非常檢點,喺一連十幾場嘅演唱會馬拉松,完全有留前鬥後嘅衝勁,而更重要嘅係,佢每次都希望將上一次演唱會美中不足嘅地方不斷改善,同時不斷去探索一啲新嘅嘗試空間!如果大家仲有印象,學友哥都試過有失誤、迷惘嘅時候,而今日佢唱嘅歌曲,加上呢啲人生閱歷,陪伴年月嘅浸淫下,就顯得更加有味道!正如佢自己都講過,佢基本上係唔會退休,而且正如局長話齋,以120歲嚟講,57歲簡直係好後生啦!所以我絕對相信喺將來,醫療科技(Health tech)會係投資新趨勢!我亦相信三年之後、剛踏入六旬嘅學友哥,喺舞台上再現光華嘅時候,會成為好多醫療保健公司爭取代言嘅目標!


徐燦傑
(逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!