2020年11月29日 

徐燦傑##延遲業績股避之則吉

2019-04-10 (週三)

每年3月為上市公司公布業績的高峰期,如果一間公司是以12月31日作為年結,就需要趕及在翌年3月31日「死線」之前公布全年業績,近年不少公司因未能趕及3月底前公布業績而停牌,到底延遲業績公布,與企業管治有何關係?請見下面例子分享:
力奇:兄弟,最近你做乜咁愁眉深鎖呀?
Prof J:咪就係因為我上個月買嗰隻股票,因為未能如期喺3月底前公布全年業績,因此喺4月1日早上被停牌,起初仲期望公司會派股息,而家真係望天打卦等復牌!
力奇:我都知道最近有多間上市公司,因未能公布全年業績而需要停牌,直至可以披露返全年業績,先至可以復牌。
Prof J:未能準時發布業績嘅公司,許多都因為核數師資料不全,或者一啲財務資料遺失,亦有部分公司更換咗核數師,而新核數師需要多啲時間去審核財務資料。
力奇:延遲公布業績,不但對股價有負面影響,更需要停牌,因此或側面反映公司嘅財務管理及企業管治都出現咗問題!
Prof J:去年上市規則修訂,若主板公司停牌18個月,創業板(GEM)公司停牌12個月,並且未能滿足港交所對復牌嘅要求,公司就會被港交所除牌。所以我而家真係好擔心自己買咗嗰隻股票嘅命運!
力奇:為咗加強企業管治要求,港交所喺去年9月曾經發出諮詢文件,如果公司公布業績時,若核數師對財務報告發出非無保留意見(Modified opinion),公司一樣需要停牌,將來如果實施咗新規,我相信好多上市公司同埋核數師都會相當頭痕!
Prof J:非無保留意見,不單包括保留意見(Qualified opinion),即有重大但非廣泛嘅失實陳述,亦包括不表示意見(Disclaimer of opinion)及否定意見(Adverse opinion),前者意指核數師未能獲得足夠證據,財務報表或存重大而且失實的陳述;至於最嚴重就係否定意見,即核數師認為財務報表有重大失實陳述。
力奇:聽落上市規則都幾嚴格,其實對小股東都幾「閉翳」,因為如果復牌無望,公司被除牌後,小股東嘅血汗錢就可能化為烏有,因此大家炒股前,必須留意公司嘅企業管治質素,如果核數師曾經發出非無保留意見,呢啲股最好避之則吉!
Prof J:不過,大家都要明白,有時有一啲客觀因素,會令業績被延遲公布,例如喺營運控制範圍之外嘅意外,又或者因資料運送過程或伺服器損毀,導致若干財務資料遺失或毀滅,都可能成為核數師發出非無保留意見嘅理由。

賴錦權(力奇)  (逢周三見報)
香港上市公司秘書、大學碩士課程兼任講師、香港特許秘書公會資深會員,致力將知識輕鬆趣味化,作為其人生的生活命題!

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部分!