2020年11月26日 

徐燦傑##再遇大阪「逸の彩」

2019-05-24 (週五)

認識我嘅朋友都知道,誇張啲講,而家我基本上喺飛機嘅時間多過喺陸地,直頭變咗電影《機場客運站》嘅男主角一樣,不過都已經習慣咗,因為新嘅工作,就有新嘅承擔!啱啱呢個星期就去咗日本大阪傾生意,喺好多人心目中,日本係一個旅遊勝地,但係對我而言,呢度已經成為一個新嘅工作環境!
今次去大阪,冇Book到慣常入住嘅酒店,反而選咗老友記——東瀛遊(6882)執行董事兼創辦人之一禤國全先生,佢哋公司喺大阪興建嘅「逸の彩」酒店(圖)入住!呢間酒店,喺一年半前試業我住過,最近喺網上知道佢哋喺旁邊起咗座溫泉大樓,於是再去住吓,想睇吓一向計仔多多嘅佢,點樣將呢間香港人打骰嘅大阪酒店提供新亮點!
今次嘅感覺,同一年半前非常唔同,因為多咗好多旅行團客,大部分都來自東瀛遊自己嘅旅行團,禤生曾經對傳媒朋友講過,佢哋透過起呢間酒店,將公司成本反而變做另一個收入來源,呢個華麗轉型,可謂相當成功!可以話係一個Self contained 嘅理想模式!
講番溫泉酒店,係採取全自動化管理,「深層水」確係一個好嘅治療,我做完之後都感覺非常放鬆!能夠喺鬧市興建溫泉酒店配套,可以見到呢間上市公司完全了解客戶嘅需要,能夠讓佢哋喺購物區血拼完後,只需要留喺酒店,就能夠好好Relax吓!另外,酒店每晚主打嘅「任飲任食」,亦絕對係一大特色,每晚10點,呢度就彷彿變成嚟自五湖四海人士嘅大聚會一樣!
呢間上市公司嘅掌舵人,清楚知道淨係靠服務業嘅旅行團,係不足以為公司帶來更加長久嘅發展!所以兩年前已經透過股東大會支持,成功轉型向日本房地產拓展,大阪絕對係第一個成功案例!嚟緊東瀛遊嘅沖繩酒店亦即將落成,以配合當地機場興建新跑道,將帶來更多遊客嘅商機!東瀛遊作為日本達人,將公司價值發揮到極致,只要基本因素愈做愈好,估值就會慢慢拉高,相信將來可以為投資者帶來更加豐厚嘅回報!

徐燦傑  (逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!