熱話 時尙 食玩 生活 旅遊 娛樂 親子 專欄 着數

徐燦傑##內幕消息點解讀?

2019-03-13 (週三) 08:00 上午

我們經常聽到上市公司刊發內幕消息公告,內容大都涉及公司敏感資料或澄清有關敏感內幕消息,《證券及期貨條例》規定上市公司內幕消息須以公眾能平等、適時及有效地取得的披露方式作出,但是投資者也需要小心分析相關內幕消息公告對公司股價的意義,請見下面生活例子分享:
Prof J:嚟緊復活節又去日本啦!而家啲機票都幾貴!但係遲啲可能有機會多一點廉價機票選擇啦!
力奇:點解你會咁講嘅?
Prof J:因為最近睇到傳媒報道,知道香港一間最大嘅航空公司正商談收購兩間廉航公司,所以間接知道呢間中資背景賣家,又要準備賣資產喇!
力奇:呢單新聞出街後,公司股價當日曾經上升3%,其後公司於聯交所網站刊發內幕消息公告作出澄清,內容大致上確認公司正在積極商談涉及一間廉航公司的收購事項,到目前為止尚未定立任何協議,進一步公告將於適當時候刊發。
Prof J:內幕消息公告目的是避免虛假市場、不實報道或者市場謠言,其實點解會有呢啲咁嘅新聞媒體報道,主因都係由於公司嘅保密功夫做得唔足夠,令敏感消息外洩,公司係有需要根據《上市規則》第13.09條,而作出內幕消息公告。
力奇:所以幾時都話商業秘密大過天,保密功夫做得唔夠,其實對企業都幾危險,雖然市場憧憬成功收購可能對公司股價有正面影響,但亦都要諗吓香港航空業競爭非常激烈,加上燃油對沖風險、分配航點限額等因素,令公司多年來處於虧損情況,只不過公司咁啱年初先出盈喜!
Prof J:如果今次敏感消息冇外洩,其實公司都唔使出公告,所以點解公司有任何潛在交易嘅商談或任何收購細節,當雙方簽署相關MOU之後,交易談判過程必須維持高度保密㗎!
力奇:打個比喻,內幕消息好似歌神許冠傑名曲「浪子心聲」一句經典歌詞咁,「難分真與假,人面多險詐」,收購事項未必一定會進行,即使最終收購落實,亦未必一定係好消息,對投資者嚟講,股價可能夾雜其他風險因素出現波動;而對於消費者嚟講,都未必一定有平價機票,作為全港最大間嘅航空公司,收購廉航公司有機會引發壟斷市場,違反《競爭條例》下第二行為守則,對整體市場機票價格可能構成壟斷影響,到時你想買平價機票的如意算盤就計錯數啦!

賴錦權(力奇) (逢周三見報) 香港上市公司秘書、大學碩士課程兼任講師、香港特許秘書公會資深會員,致力將知識輕鬆趣味化,作為其人生的生活命題!

徐燦傑
人稱ProfJ,大學財金系前教授,金融達人,娛樂.經濟學主理人,諗deal,做deal成為咗生活嘅一部份!