2020年12月5日 

張栢芝產後極速收身 引周星馳攬腰

2019-01-22 (週二)

第3度榮升媽咪的張栢芝早前自爆陀B時體重達180磅,前日她為有份聲演的新片《新喜劇之王》宣傳時,就大晒兩個月內火速收身的成果,引得導演周星馳也要攬其纖腰!

去年11月誕下第3胎「小王子」的張栢芝,早前為周星馳(星爺)執導的賀歲片《新喜劇之王》獻聲,當時她自爆體重約130磅,懷孕時期達180磅!誓言「畀多兩個禮拜就瘦番」的栢芝,前日就孖星爺、王寶強等到廣州宣傳電影,現場所見,穿上貼身連身裙的她已極速收身,不單止手腳纖瘦,條腰亦非常幼,搞到連星爺同王寶強都忍唔住要攬吓佢條腰!
而早前吳孟達揚言與星爺「老死都不相往來」,但星爺似乎未有太在意,還隔空邀對方合作:「我之前有搵過佢拍戲,不過佢當時身體有啲唔舒服,往後我會繼續努力,再搵佢合作。」此外,陳曉東將於3月假紅館舉行巡唱,有傳獲太太批准邀舊愛栢芝任嘉賓,他昨日現身記者會時說:「應該未必搵,佢喺生活上都有新開始,應該需要多啲空間,所以都唔打擾。」但透露梁詠琪會擔任表演嘉賓。