2020年11月27日 

嫁個好老公 張美妮

2019-01-04 (週五)

張美妮夫婦真係好恩愛!
訪問當日,單憑張美妮一張嘴已經「閃」得旁人叫救命,「我老公諗嘢好叻、好有生意頭腦,所以我好崇拜佢。開餐廳嘅成功秘訣?就係有個好老公囉!」13年,她與髮型屋老闆黃偉強結婚,並於沙田開了第一間美式餐廳“American Seafood and Grill”。業務上,張美妮沒有太多實質的幫忙,反而做好賢內助的本分,打理家頭細務、閒時給予丈夫意見和愛的鼓勵,同時亦好好建立自己的事業。不過,兩人上月宣布造人成功,大肚後的張美妮每日食飽就瞓、瞓飽就食,生活難得寫意,連她也笑謂:「好在女嘅陀B,男嘅打理餐廳,大肚後佢都極力阻止我做嘢,怕我辛苦同危險,好Sweet。」

被譽為「火辣人妻」的張美妮於13年下嫁髮型屋老闆黃偉強(KK),雖然貴為「闊太」生活優哉游哉,但婚後她不單止繼續拍劇、做主持、幫忙打理Sigo Hair Salon生意,早年更踩入飲食界,於沙田置富第一城商場開設第一間食肆“American Seafood and Grill(美國餐廳)”,去年又再擲7位數於天水圍開分店,生意愈做愈大!
搞餐廳秘訣
「我老公好鍾意做生意,佢都好想發展多一門生意,擴大事業版圖。」恰巧,當年某商場一個千呎舖位正招攬租客,加上美妮父母以前經營西餐廳,於是外父與女婿一拍即合,決定博一鋪,搞多瓣飲食生意。
美國餐廳經營4年多,以價廉物美的正統西式菜餚打響旗號,逐漸亦累積了一班街坊熟客,「依家好多餐廳都Fusion啲,但我哋覺得只要食材做得好,做番正宗扒、意粉、海鮮拼盤等,其實都有班客係鍾意。」然而,最困難的莫過於怎樣留得住食客,「初初啲人嚟會因為新鮮感,或者聽人講口碑幾好,咁就嚟一、兩次,但之後點Keep到佢哋成日嚟就好重要,所以我哋都時不時換一啲新菜式,吸引佢哋嚟。」相比沒甚成本的幕前工作,一間餐廳既要交租金,又有燈油火蠟、人工等支出,要長久經營實在不容易,看看圈中一班門外漢便知了,好似江若琳、馬德鐘等的食肆相繼倒閉,問美妮的成功秘訣?她冧爆道:「秘訣就係有個好老公!哈哈!」

稱職賢內助
「如果係我搞嘅話,真係好快唔OK,因為實在每日都見到老公皺眉,心諗『做咩成日都唔開心咁?』佢話只係諗緊嘢,因為佢做生意係無時無刻,喺屋企坐喺度都諗緊有乜問題,就算冇問題,佢話自己都要諗啲問題出嚟,唔可以見生意好哋哋就冇嘢,可能有啲潛在嘅問題係唔知,唔理佢就會慢慢咁衰退,所以要成日發掘,或者見到有少少蛛絲馬跡,佢就去探索、同員工傾。」這盤生意,起初有外父做軍師教路,及後由KK慢慢摸索,到今日自己一手一腳打理,「初初同佢拍拖,其中一樣令我好欣賞嘅係,佢諗嘢好叻、好有生意頭腦,我好崇拜佢。」美妮心心眼說。
作為太太的她沒有做生意的潛質,就惟有做好賢內助的角色,「講真我參與度比較少,通常都係宣傳、拍攝、招呼朋友,因為做幕前同做生意嘅思維好唔同,但我都會畀意見,將朋友啲意見又轉達畀老公聽,佢都成日Send Menu、裝修相畀我睇,咁我就讚吓佢,我諗我喺佢身邊最主要就係鼓勵同支持。」

最幸福孕婦
「雖然只得兩間,但慢慢都希望變集團⋯⋯」美妮夫婦雄心壯志,原來努力搵銀,為的就是迎接即將降臨的小生命。比起「誕」下美國餐廳,上月宣布陀「真.BB」的她更興奮,「原來BB唔係努力就有!雖然生B都有緊張、驚嘅時候,但比較起嚟個喜悅係蓋過咗好多。」
回想5年的造人辛酸,她也曾經歷焦急與灰心的時候,「嗰時身心都未Ready,純粹啲人問到,自己又覺得結咗婚應該要有BB,但一年前覺得到咗呢個年紀、同老公結婚咁多年,我真係想做呢件事,所以就停咗啲劇集,唔畀自己咁忙,專心做一個太太應該做嘅嘢,而唔係好似之前咁比較自我,想做自己嘅嘢多過去理屋企或老公。」昔日丈夫最欣賞的「事業型」美妮,如今變成他條大肚婆,幸「廿四孝人夫」亦已適應,「佢開始習慣老婆百無聊賴咁攤喺屋企,感受到老婆將來喺屋企湊小朋友嘅好,早排接司儀Job,佢都極力阻止我,怕我辛苦同危險,其實我暗裏有啲爽。」但美妮直言產後會繼續工作。

American Seafood & Grill
地址:沙田置富第一城商場地下71-73 & 82B號舖
電話:2790 0368
營業時間:星期一至日11:00 - 22:30