熱話 時尙 食玩 生活 旅遊 娛樂 親子 專欄 着數

先苦後甜 可嵐

2019-05-31 (週五) 08:00 上午

世事就是如此玄妙,要不是當年跟從事飲食的圈外人尤子威結婚,可嵐對經營飲食業的認知可能仍是零,又要不是遇上家暴、離婚種種痛苦經歷,她亦不會磨練成一個堅強、獨立、自信的單親媽媽,「人生可能係會有啲起伏,只要你能夠面對、克服最苦嗰Part,甘甜就會喺之後出現。」可嵐說。
迷惘過後,可嵐終於找到自己的興趣與新方向,近年來其歌唱及演藝事業不但愈做愈好,早前她更「東山再起」,與友人合資於元朗開設一間港式糖水舖「樂都堂水」,繼續追尋自己的飲食生意夢。

撰文:黎寶倫|攝影:ChaseK
服裝:Fashion Club
髮型:Johnny Chong @Hair Corner Sino Plaza
美甲:Beyond Nails Boutique

現年33歲的可嵐於10年下嫁經營日本餐廳的尤子威,翌年誕下兒子尤俊(Eugene),後來還考獲認證職業咖啡師牌,與友人合資在西貢開設咖啡小店,惜不敵加租,最終結業收場;同時,她與尤子威的婚姻也維持了4年便告終。霎時間變「雙失」,這位單親媽媽卻沒有一下子被打沉,反而愈挫愈勇,自己創立的L Music Production漸上軌道,去年更開演唱會、到外蒙古拍電影等,而其有份投資的糖水舖「樂都堂水」,本月亦於元朗正式開張!

開舖發噩夢
回想6年多前,幾位咖啡師雄心壯志開咖啡店,更不惜工本打造「西貢No.1咖啡」,結果賺得「雞碎」導致入不敷支。汲取教訓後,本來打算重開Cafe的可嵐卻誤打誤撞,獲冰室老闆賞識,合資於晚市賣港式Fusion糖水,「我同囝囝去完台灣旅行後,自己就返去學整芋圓、糖水,之後開心Share畀冰室嘅老闆同員工,點知佢問我有冇興趣開舖,跟住我哋就成為元朗天空之城第一間糖水舖嘞。」

為了讓饕客食得滋味又健康,自我要求嚴謹的可嵐在短短個半月內,四處搜集資料又反覆試煮,終於研發出令其滿意的小食和糖水,仲搞到晚晚發噩夢,「我真係發夢都整緊糖水!始終『樂都』係老字號,我都有啲壓力,唔可以丟架,自己又唔係糖水專家,所以承諾咗開舖嘅時候,好想令自己想快啲Pick Up到、製作更多高品質嘅糖水。」可是,今次仍堅持用上最頂級的食材,難道不怕再蝕本嗎?「呢度啱啱開始經營,加上做街坊生意,希望薄利多銷,吸引大家經常嚟食。」

為愛子打拼
除了港式糖水外,這位「廿四孝媽咪」為了寶貝仔,更在Menu上特設一道台式魯肉飯,好讓對方一放學便吃到至愛的「媽咪牌愛心料理」。說到要打理餐廳,又要兼顧幕前工作,未知Eugene可有埋怨她沒時間陪自己?可嵐哈哈笑道:「冇喎,因為佢有魯肉飯食,好滿足!」事實上,囝囝就在鄰近返學、補習,兩母子見面的機會反而有增無減,她續道:「佢好懂事,明白點解要開新生意,佢都好鼓勵我,知我收工夜,所以每晚都會做好晒功課、瞓住覺等我,我都會堅持每朝送佢返學,禮拜日就Family Day。」
雖然生活忙碌,但她感激Eugene一直在身邊陪伴。比起早年,同時打5份工擔起頭家的日子,現時可嵐總算捱過來了吧?「有時冇苦又唔知甜味係點嘅。我好開心有呢個經歷,依家再望番轉頭,覺得自己當時好緊張、唔知點處理,亦都好迷失,但經過一段時間,好似前路更加清晰,原來我冇呢啲經歷嘅時候,我都唔會知道自己最鍾意、最想做啲乜。」

低谷中磨練
經歷家暴與離婚後,14年起獨力湊大囝囝的可嵐變得更豁達、更硬朗,「每樣嘢都係自己嘅選擇,當初嘅另一半都係自己選擇嘅,既然發生咗啲事,就要重新面對、搵自己嘅道路,其實睇嘢有好多角度,即係一張白紙明明好大張,你係都要睇住花嗰一點,咁個人咪唔開心囉。如果唔係咁,可能我依然唔知自己前路、想要啲乜,甚至好多嘢都要受人支配,但依家起碼活出一個真嘅自己,會發現自己可以做嘅嘢仲有咁多。」
那麼現時跟前夫的關係如何?去年初以調解形式離婚,並獲得囝囝撫養權的可嵐,直言雙方再見亦是朋友,「我已經釋懷晒,甚至好感激佢,若然唔係認識佢、同佢一齊過,我都唔會對餐飲業有更深入嘅了解,嗰時喺佢身邊都非常欣賞佢,佢係一個好出色的餐飲人,所以之前開舖,我都有搵佢諮詢意見、多謝佢。」她又透露稍後計劃衝出元朗開分店,並以嶄新模式向港、九市民推廣自家的港式糖水,令人拭目以待!

樂都堂水
地址:元朗錦田高埔村108號天空之城第3座地下
電話:2234 9988
營業時間:18:00–22:30(星期一至二)、18:30-23:30(星期四至日)、星期三休息