熱話 時尙 食玩 生活 旅遊 娛樂 親子 專欄 着數

何文俊##骨氣與跪低

2019-08-16 (週五) 08:00 上午

Prof J:兄弟,冇見一排,上星期又唔交稿,你走咗去邊呀?
仲尼:冇咩特別,見小朋友放暑假,咪一家大細出外放鬆幾日囉。不過坦白講,之前喺香港每日對住大量警民衝突場面,感覺真係好痛苦,但無奈地去到台灣,喺民宿一打開電視,當地狂播有關「反送中」嘅新聞,手機App亦不斷推播最新消息,根本完全抽離唔到!
Prof J:我諗你唯一真正抽離嘅時間,係搭緊飛機嗰個幾兩個鐘!
仲尼:唉,唔好講搭飛機喇,我對我一直支持嗰間航空公司好失望!
Prof J:做乜咁講呀?
仲尼:大家都知道,7月21日喺上環發生嘅警民衝突中,有44人被控暴動罪,當中包括一名國泰航空嘅年輕副機師。呢單案其實未審,警方會提交乜嘢證據、甚至會否好似「2016年魚蛋革命」咁,向部分被告修改控罪為「非法集結」,都係未知之數,因為暴動罪入罪門檻頗高。更何況,如果控方認為證據足夠,又點會容許各被告只需要以1,000蚊嘅「低代價」保釋呢?但令人氣憤嘅係,呢位機師所屬嘅航空公司,竟然對佢「未審先判」,司法程序未完結,就先行解僱該名機師。你諗下之前嘅「七警案」,被告都只係停職候審啫,本身仲要全部定罪,到最後有兩個上訴成功,佢哋都可以復職啦!國泰咁做,係咪向強權跪低呢?
Prof J:冇計啦,呢個世界有強權冇公理。因為中國民航局對國泰發出安全風險警示,要求國泰禁止派出參與、支持非法遊行示威及暴力衝擊嘅員工執行內地航班飛行任務,母公司太古集團主席施銘倫仲北上向民航局副局長「面聖」,因為公司有大量航班都要途經內地空域,亦經營大量內地航線。如果被懲處,相信會對國泰嘅經營構成有重大威脅,咁大隻痛腳喺人哋手上,又點會唔跪低呢?有中資行仲踩多腳,建議「強烈沽出」國泰,目標價仲要得6蚊!
仲尼:另一方面,國泰航空行政總裁何杲向員工發出通告,話明如果員工參與機場集會,就會受到包括解僱在內嘅紀律處分,有員工就批評此舉等同散播白色恐怖。我覺得直頭就好似搬咗大陸公司嗰套落嚟咁,用「飯碗捆綁政見」,「食佢嘅飯」,就唔好「砸佢個鍋」,要思想純正先有得留低。
Prof J:不過國泰全盤配合之後,中國民航局噚日亦公布,國泰已經按時匯報飛往內地及飛越內地領空的機組人員身份資料,符合當局警示要求。所以,呢場風波都叫做初步解決咗啦。
仲尼:本身我就覺得太古集團係相當有骨氣嘅,你淨係睇吓佢哋旗下太古廣場,同沙田新城市廣場喺處理示威者嘅手法及坊間評價就知啦。不過旗下國泰航空面臨「生死存亡」時刻,骨氣又點能夠當飯食呢?值得留意嘅係,當國泰炒咗機師、向內部發出警告,兼全盤配合中國民航局要求之後,股價即刻連續兩日大升!所以話呢,想要榮華富貴就跪低啦,你睇吓幾多親政府政客,無論做錯幾多嘢、站錯幾多次邊,都穩居既得利益者高位,日日企喺「製造問題嘅人」嗰邊,去批評「提出問題嘅人」,你就明白啦!

何文俊(仲尼)  
《都市日報》財經及地產版主管,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部分!
(逢周五見報)