2020年11月24日 

何文俊##發展商自律得啖笑?

2019-04-26 (週五)

仲尼:兄弟,呢排樓市咁旺,你成日都話想買樓投資,有冇趁復活節假期去睇吓樓呀?
Prof J:講真吖,早排我真係想睇樓㗎,但見到新盤資訊咁唔透明,經常透過招標、而唔係出價單明碼實價開售,要準買家自己鬥開高價搶貨,感覺「伏伏哋」,最後就打消咗個念頭喇。
仲尼:根據2013年4月生效嘅《一手住宅物業銷售條例》,政府限制提供100伙以上嘅新盤,喺每輪銷售至少推出兩成單位,但就冇明確規定以發出價單還是招標形式推出,所以就提供咗空間畀發展商「走盞」,經常利用招標「過骨」。近月情況仲愈來愈失控,招標單位唔止係慣常嘅豪宅同埋特色戶,甚至連上車盤同納米樓都走去招標,而且喺發展商招標「價高者得」賺盡利潤嘅同時,招標條款往往「魔鬼在細節」,對小買家非常不利。
Prof J:呢樣我知,例如有啲發展商唔公布底價、冇講樓價優惠同稅項回贈、可以隨時收起唔賣咁,試過一個喺白石角嘅屋苑,低層單位中標成交價,竟然比同座高層單位價單成交價高出一大截,買家咁就白白買貴咗喇。不過,據聞喺最近一年內,發展商仍然透過招標賣出超過1,600個單位,套現150億喎。
仲尼:因此,地產建設商會最近發表冇約束力嘅指引,希望發展商喺豪宅以外嘅新盤,首張價單至少有20%單位以價單形式公開發售。商會主席梁志堅仲講到明,中小型單位招標出售常規化並不理想,而上車盤並唔適合以招標方式出售咁話。
Prof J:作為地產界龍頭之一嘅長實,佢哋嘅「樓神」趙國雄都唔幫自己人,講明有行家過度濫用招標形式賣樓,搞到市場透明度下降,因為買家難以得悉單位實際成交價,仲話發展商應該「自律」㖭,你話好唔好笑?喂,唔通有錢唔賺咩!
仲尼:老實講吖,我就笑唔出喇。正如頭先所講,地建會嘅指引係冇約束力㗎嘛,發展商做咩要遵守先?好似一個重新推出嘅屯門新盤咁,喺公布發售嘅70伙入面,只有41伙係以價單形式推出,而拎出嚟招標嘅單位仍然有29伙,當中更有17伙係300呎樓下嘅「納米戶」,其餘亦以中小型單位為主。嗱,呢個盤合共有371伙,呢70伙本身都唔夠兩成啦,更何況入面有29伙係用嚟招標?佢哋咁做,係咪擺明剝地建會牙骹先?咁又談何自律呢?
Prof J:不過我又諗到一個有趣嘅處境!地建會主席梁志堅,同時亦係會德豐地產嘅主席,嚟緊佢哋有個將軍澳大盤即將開價,發展商之前已經講明呢個係上車盤,咁到時又會唔會畀足面「堅叔」,將首批兩成單位以價單形式推出,向其他發展商作出良好示範呢?
仲尼:不過,小弟嘅愚見係,政府應該再密切觀察發展商動向,如果濫用招標情況持續,即係呼籲自律無效啦,咁就應該頒布新規定,至少將地建會嘅指引落實,又或者要求新盤500呎以下嘅非特色戶(不設天台、平台),都必須以價單形式推出,唔好搞到小市民想買個細單位置業安居,都要同人鬥開高價爭餐死啦!喺香港買樓已經難過登天,難得有呢個能力,都要過五關斬六將咁,仲嫌香港人唔夠慘咩?

何文俊(仲尼)  
《都市日報》財經及地產版主管,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部分!

(逢周五見報)