2020年11月26日 

何文俊##當酒店及零售業「去蕪存菁」

2019-08-30 (週五)

Prof J:由6月初引發嘅「反送中」風波,由於政府拒絕回應民間「五大訴求」,情況有愈演愈烈迹象,多區引爆嚴重警民衝突,隨住多國對香港發出旅遊警示,近月訪港旅客暴減近半,好多酒店或者零售商抵受唔到住壓力,開始出現經營困難。
仲尼:公平啲講,近年訪港嘅香港遊客,接近八成係嚟自大陸,香港發生咁大規模嘅社會運動,中國當局梗係唔鼓勵遊客訪港啦,原因你懂的!不過,就算冇發生呢件事,正如我哋喺呢個專欄之前講過,其實本港零售業都開始放緩,例如金飾、電器同耐用品銷量已經跌咗好多個月,主要原因係人民幣匯率貶值、喺香港「鳩嗚」嘅吸引力大不如前,加上內地旅客消費力減退,同埋本地人減少消費所致,當遇上「反送中」運動呢個引子,「斷崖式急跌」就在所難免。據我認識嘅某國際知名品牌管理層透露,近兩個月生意額錄得接近50%按年跌幅,所以最近有零售組織發信,呼籲業主減租一半「共渡時艱」,不過租值減半即係意味舖價大跌,班業主梗係唔啋你啦,所以近期亦開始出現零售結業潮。
Prof J:旅客大減,除咗零售業之外,最大影響一定係酒店業。據我所知,喺尖沙咀一啲五星級酒店,由於入住率跌到兩三成,就索性關閉幾層樓面慳電費,並要求員工放無薪假,以減低營運成本。
仲尼:最近睇新聞,見到竟然有青衣三星級酒店,每晚入住價格只係70幾蚊,連稅90蚊都唔使,雖然周末貴少少,但租足成個月都只係3,000蚊左右,平過劏房一大截,仲包埋電費、水費同專人執房!
Prof J:一切市場價格,都係基於供求情況,當供應遠高於需求,割喉式減價就在所難免!
仲尼:對於呢個現象,我有少少睇法。因應大陸自由行人數連年急升,各區近年起咗好多酒店,即使係住宅或者工業區嘅「牙籤地」,好多都用嚟起「精品酒店」,引起社區人士質疑規劃失當。當香港旅遊業咁依賴單一市場,不斷為迎合呢個市場而狂起酒店,一旦遇上突發事件令旅客人數急跌,咁咪好似水退咁,知道邊個冇着泳褲囉!坦白講,一啲位置冇咁方便、配套冇咁好嘅三四線酒店,平時都已經比較難吸引消費力較高嘅國際旅客,當連自由行或大陸團都消失埋,住客真係可以暴跌九成,隨時幾個月就經營唔住,想唔跳樓式劈價都唔得啦,情況就好似每次樓市急挫,「大西北」屋苑往往先走一步,引領市場跌幅咁囉。
Prof J:我哋成日講企業管治理論吖,其實有一點係相當重要,就係一間公司、一個行業嘅「可持續發展能力」,簡單嚟講,即係擁有經營嘅長遠方針,為企業、社會、員工及客戶等持份者締造最大價值,將社會、經濟及環境要素融入發展策略,讓企業能掌握種種機遇及風險。不過睇番近期香港旅遊及零售業面對嘅困境,睇嚟佢哋呢方面表現就唔達標喇。
仲尼:冇錯,當一間公司遇上一兩個月逆境就要生要死,要求業主減租、又要裁員或者迫員工放無薪假,甚至可以迅速結業,咁係咪反映佢哋欠缺可持續發展能力,一直艱苦經營,要長期倚賴內地自由行呢劑「強力止痛藥」,先頂得住租金、人力等高昂成本呢?如果透過呢場風波,可以令租金重回合理水平、減少旅遊業對單一市場嚴重倚賴,令某啲公司擴張前更深思熟慮,縱然會面對短期陣痛,但有助將來更健康嘅經濟發展,會唔會係塞翁失馬,焉知非福呢?


何文俊
(仲尼)  
《都市日報》財經及地產版主管,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部分!

(逢周五見報)