熱話 時尙 食玩 生活 旅遊 娛樂 親子 專欄 着數

何文俊##澳門發展「海洋金融業」?

2019-06-28 (週五) 08:00 上午

Prof J:兄弟,澳門特首即將揭開戰幔啦,作為大熱門嘅立法會主席賀一誠已經宣布參選,至於現任特首崔世安唔知係咪想喺臨走前留畀澳門市民一個好印象,去年底宣布連續第12年派錢,一共豪使187.5億元,每位永久居民派發一萬大元,仲提供養老金、醫療券、低收入津補貼等經濟補貼。你作為「港澳混血兒」,嚟緊8月又有錢收,應該滿意啦!
仲尼:老實講,當你見到香港嘅「波叔」派四千蚊都搞到一鑊粥,行政費使咗3億元,但連表格都可以遺失,仲派咗年幾都未派完,你就知道澳門喺呢方面嘅工作做得好好多!不過,由於澳門政府稅收嚴重依賴博彩業,例如近年博彩稅已經佔政府整體稅收超過八成,所以都幾受大陸經濟牽動,如果博彩業表現不濟,恐怕亦會影響澳門嘅民生政策!
Prof J:不過市場一直認為,澳門產業太過單一,只有博彩業強大,其他產業就比較弱,所以希望當地經濟更加多元化。澳門理工學院較早前就有學者發表文章,建議發展「海洋特色金融業」。
仲尼:呢個術語幾有趣,海洋特色金融業?同個海有咩關係呢?點解喺澳門發展呢?
Prof J:研究文章提到,澳門有幾項優勢,有利於發展海洋特色金融業,首先係澳門水域面積達到85平方公里,係陸地面積嘅3倍,而且南面有廣濶海域及多個離島,可以好似租借橫琴咁,向中央借取空間發展海上物流業,主攻廣東省西部市場;其次係澳門政府財政盈餘,外匯儲備豐厚,具備發展金融嘅實力;加上澳門具備政治穩定、自由港、稅制低等發展特色金融嘅優勢;最後係國內甚至香港嘅金融制度體系及產品,幾乎與海洋經濟脫節,因此澳門應該充分利用以上空間,發展與海洋經濟融合的金融體系。
仲尼:聽你咁講,澳門作為「海上絲路」重要據點,係有發展「海洋特色金融」嘅條件,但實際運作又點呢?
Prof J:由於篇幅有限,我就簡單咁介紹吓啦。首先係政府可以主動引導金融體系與海洋經濟結合,例如完善發展海洋經濟嘅金融立法機制、修訂融資租賃船舶嘅稅務鼓勵制度,以及簡化相關公司嘅落戶程序,吸引國內外大型船舶融資租賃企業去澳門投資。其次,澳門政府可以鼓勵保險企業開發海洋產業險種,以完善海洋產業保障體系,分散相關產業風險。第三,係發展特色投融資機制,為海洋產業提供資金支援,由於海洋經濟具有地域屬性明顯、高風險及新興等特徵,發展相關債券市場空間較大,喺滿足相關產業資金需求同時,亦有利於利用債券市場,促使企業股份制經營、參股制、兼併收購等等。
仲尼:如果以上產業能夠成功發展,希望可以扭轉當地經濟長期倚賴博彩業嘅困局啦。至少,澳門大學生畢業之後,都起碼多一個就業選擇,唔使淨係諗住入賭場做嘢或者考公務員吖!

何文俊(仲尼) (逢周五見報)
《都市日報》財經及地產版主管,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!