2020年11月24日 

何文俊##從企管角度#談「修例」風波

2019-06-21 (週五)

仲尼:兄弟,最近因為政府執意修訂《逃犯條例》引起嘅巨大爭議,隨着特首林鄭月娥一句「暫緩」,總算迅速降溫。不過連建制中人都認為,今次政府可謂自製「完美風暴」,甚至影響國家對台及外交部署。你係企業管治專家吖,你認為如果用企管角度嚟講,今次特區政府表現係點呢?
Prof J:優良企業管治需符合六大條件,係Effectiveness and efficiency (有效性和效率)、Responsibility and accountability(責任和問責制)、Rules of law(遵守法律規則)、Moral integrity(道德誠信)、Transparency(透明度)同埋Participation(參與度)。
仲尼:或者我哋講吓有效性和效率先啦,喺今次事件中,由於政府唔聽民意,諗住喺立法會數夠票,立法會主席梁君彥限制辯論61小時就要速速通過,又諗住靠警方保護立法會,就可以唔理民意而過關,結果低估咗學生反對修例嘅決心,引發6月12日嘅警民嚴重衝突,同埋兩次百萬人大遊行。本身呢,政府係好有效率㗎,成件事冇經過廣泛諮詢,喺4月3日首讀之後,就期望喺6月中二讀三讀通過,但結果「搞出大頭佛」,要無限期暫緩而「因快得慢」,以企管角度分析呢方面表現,就當然唔合格啦!
Prof J:我哋又講吓責任和問責制啦!對上兩個星期日,上街市民嘅一大訴求,就係要求負責事件嘅官員下台,但暫時只見特首同保安局局長道歉,但二人都拒絕躹躬,睇嚟就欠啲誠意喇!不過佢哋下唔下台,學建制派元老曾鈺成話齋,都唔到佢哋決定啦,相信要等「終極大老闆」發落,所以問責呢部分,當佢哋做咗少少啦!
仲尼:跟住就輪到「遵守法律規則」喇喎,如果特區政府係一間公司,佢哋嘅「保安部」就係警隊啦!睇番6月12日嘅衝突,雖然係市民發動衝入立法會在先,但「保安部」嘅表現簡直令人嘩然,相信大家都可以從網上片段略知一二!例如負責清場嘅速龍小隊制服冇警員編號,事後保安局仲以「無位放冧把」嚟解說!喂,香港先生得條泳褲着,都大大個編號掛喺度啦!至於其他行為,包括以橡膠子彈射市民頭部、向合法示威區狂放催淚彈、圍毆已被制服人士、講粗口驅趕並以胡椒水噴射記者等等,令人質疑警隊紀律性何在。更值得爭議嘅係,「一哥」盧偉聰質疑示威者戴口罩,係為咗做犯法事無人認得,咁速龍小隊膊頭冇冧把,又係咪同一道理呢?明明6月9日立法會門外清場時,佢哋都有掛冧把㗎喎!所以喺企管原則呢部分,政府表現可謂「有目共睹」喇。
Prof J:咁喺道德誠信同透明度呢兩方面,政府今次處理反修例風波,亦有好大嘅改善空間啦,因為我哋喺新聞見到,整個行政會議、建制派同高官團隊,喺出咗事後只係不斷「割蓆」,A話B諮詢不足,B話A冇反映足夠民意;你話我定性暴動,我又話應該係佢決定告唔告暴動罪;明明最落力推銷修例嘅政黨,事後又話已經同政府表達過市民憂慮。咁究竟市民應該信邊個呢?究竟係邊個定性暴動,又係邊個聽完意見都堅持修例呢?
仲尼:最後想講係管理團隊喺整件事嘅Participation(參與度),政府團隊喺修例二讀前,參與度都算係好高嘅,例如多次上立法會解說,亦因應商界憂慮而將可引渡罪行門檻提高,因為佢哋想快啲通過吖嘛,咁梗係落力啦;不過始終修例太富爭議性,不為市民所接受。不過最值得一讚嘅「持份者」,反而係人數最多、但權力最小,可比喻作上市公司小股民嘅普羅市民,因為有數以百萬計嘅香港人,逼爆所有可以去維園嘅交通工具,連續兩個星期頂住酷熱天氣,扶老攜幼咁出嚟向董事會(政府)說不,結果推翻呢項可能有損佢哋利益嘅議案!

何文俊(仲尼)  
《都市日報》財經及地產版主管,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部分!
(逢周五見報)