2020年11月24日 

何文俊##反制華為禁令的奇招

2019-05-24 (週五)

仲尼:中美貿易戰愈演愈烈,美國向中國2,000億美元商品徵收25%關稅後,總統特朗普亦簽署行政命令,禁止美企使用威脅國家安全的外國電訊設備,科網巨擘Google隨即計劃暫停與華為合作,華為現有智能手機將無法更新Android作業系統,新推出的手機亦無法使用Google Play Store下載應用程式。
Prof J:不過美國商務部本周一發出臨時許可證,暫時放寬華為貿易限制90日,Google周二亦宣布計劃在放寬限制的90日期間與華為繼續合作,換言之雙方又有90日緩衝期。呢招好明顯又係特朗普嘅「一手緊,一手鬆」慣技,先提出看似嚴厲嘅制裁手段,再暫時留一手畀空間你傾吓條件,以圖喺短時間內令對方屈服,爭取最大利益。
仲尼:不過如果90日後,Google仍然選擇同華為分手,對華為都幾傷,試想像,冇咗Google Play Store,亦冇得更新手機App嘅華為電話,仲會有幾多人想要呢?呢招可謂一劍封喉,難怪華為二手手機即時大冧價!
Prof J:所以華為已經有心理準備,仲一早做緊嘢,佢哋話最快今年秋季,就可以推出自家開發嘅作業系統,可以兼容 Android 應用程式。
仲尼:不過如果我係海外華為手機用戶,可能會質疑呢個自家系統嘅保密程度。點解咁講?因為內地另一手機巨頭小米,本身都有自家研發嘅「小米應用商店」,亦有得下載WhatsApp、Facebook等熱門程式,但就有資訊安全公司聲稱,喺小米商店下載嘅呢啲Apps,竟然會連接中國伺服器,懷疑呢啲Apps放到小米商店供人下載前,已經被預先修改並回傳資料,以作監控用途。以華為嘅軍方身影,可能會令海外用家擔心,佢哋會唔會利用自家研發嘅系統,以達到監控及維穩目的呢?所以,我相信即使華為最後真係研發出「華為商店」,都未必可以彌補同Google分手嘅損失,難免只能專攻國內市場。
Prof J:老實講,中國官方喺貿易戰期間,一直對華為呵護備至,無論喺孟晚舟被捕,以及華為遭制裁等事件上,反應都非常大!如果華為只係一間普通民企,官方反應會唔會咁唔尋常呢?咁樣等同向全世界公告,華為呢間公司對國家幾咁重要。美國仲唔睇準軟肋嚟窮追猛打咩!
仲尼:不過喺華為事件上,中方一直捱打,我就忽發奇想,有個瘋狂建議!早兩日咪出現咗一單「假新聞」,話騰訊主席馬化騰計劃下月起,對中國及港澳台嘅蘋果公司裝置,不再支援微信及微信支付服務嘅,仲有股評人信以為真,喺節目引述消息!如果中國喺貿易戰繼續被圍剿,不如就嚟一招終極反撲,要求騰訊同阿里巴巴為國家作出貢獻,停止微信支付、支付寶、微信、微博、淘寶等內地熱門手機程式,喺蘋果App Store及Google Play Store嘅下載及更新,等數以億計用慣呢啲Apps嘅中國手機用戶放棄外國品牌手機,為華為、小米大增內需市場份額,實行自己市場自己瓜分!反正成日有愛國人士用蘋果手機發微博支持華為,一於幫佢哋真正轉投國產機懷抱,做番個言行一致嘅中國人!

何文俊(仲尼) (逢周五見報)
《都市日報》財經及地產版主管,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!