熱話 時尙 食玩 生活 旅遊 娛樂 親子 專欄 着數

何文俊##創業板的「斷頭台」

2019-04-12 (週五) 08:00 上午

仲尼:兄弟,最近港股走勢勇咗好多,又見一大堆公司排隊上市喇。不過我留意到好多新股招股時,市場反應都係「麻麻地」,唔少公司掛牌後股價「潛水」,例如舊年嗰207隻IPO咁,年尾埋單竟然有77%跌穿招股價,搞到我都唔敢抽新股!
Prof J:係㗎,因為而家證監會做咗好多功夫,希望將新股市場Reset!喺呢個過程期間,就一定有好多動作,亦少不免會有震蕩!你估上市話咁易咩!一個主席敲完铜鑼、飲埋香檳,先至正式為呢間上市公司嘅故事揭開序幕,好似而家啲電影咁愈來愈長,有排玩啊!
仲尼:嗱,我不嬲知你講嘢有深度又有水平㗎喇,突然間提到電影,有咩嘢想同我分享先?以前我都好鍾意抽新股,但損過手之後,都變得愈來愈避忌,因為股價點樣走,仲難估過利物浦定曼城捧英超!但肯定嘅係,啲錢首先就畀包銷商賺咗,我哋啲散戶就「任人魚肉」!
Prof J:大家都知,而家創業板轉主板難咗好多,所以之前果批創業板股,若擁有轉主板條件嘅話,就更顯得珍貴,因為有機會將殼價提高,未來價值有機會兌現,但呢個主觀願望能夠做唔做到呢?都有好多嘢要考慮!情況就好比你買咗期權一樣,一個唔覺意過咗最佳嘅行使時間,錯過咗大好形勢,遇着「DQ風潮」,就隨時渣都冇,咁你話係咪好戲劇性喇,仲鋒迴路轉過最近幾套以ICAC為主題嘅電影啦!
仲尼:係囉,之前有市場消息話,GEM仔嘅殻價最高峰係4億銀,但隨住「啤殼」活動銳減,創仔殼價都已經江河日下,據聞得番一半多啲咋,陰公!
Prof J:其實「殼價」就好似香港人買樓咁──買家希望用最平嘅價格去買,而賣家就希望用最高嘅價格去沽,近排我見到好多創業板,市值跌到少過1億,有啲甚至得兩三千萬,冇業務又冇乜資產,價值就梗係好似食咗星爺套電影嘅「一日冚包散」咁啦!你話邊度有買家肯用最高峰價格去買呢?買嗰個都係傻仔啦?
仲尼:咁又啱,但係頭先你講到最後一批夠能力轉主板嘅GEM呢?喺監管當局取消創業板轉主板嘅簡化申請程序之後,佢哋嘅價值又有冇受到市場氣氛影響呢?
Prof J:呢啲公司係物有所值,但係要照轉板嘅話,本身業務都要比較健康同具有持續性!所講嘅合資格上巿公司,包括係2017年6月16日或之前喺創業板上市、同埋已提交有效創業板上市申請(並其後成功於創業板上市)嘅所有創業板上市申請人。不過我又想講吓其他欠缺能力嘅創業板股,如果上市之後,股價賣散晒,市值變得好低,仲要欠缺「相當價值資產」同埋「足夠業務運作」,就隨時被聯交所盯上,成為「DQ目標」,被列入除牌程序,走上「斷頭台」!據聞市場有近百間呢啲咁嘅上市公司,真係要放長雙眼等睇戲喇!
仲尼:你知我啦,經常都聽你講道理,嚟緊呢場戲,真係要聽住你嘅旁白嚟睇喇!

何文俊(仲尼)  (逢周五見報)
《都市日報》財經及地產版主管,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!