2020年11月26日 

何文俊##一個反映經濟好差嘅數字

2019-02-08 (週五)




Prof J:巴打,豬年已經來臨,今日係大年初四,喺度先祝你萬事如意,心想事成,但最緊要一定係身體健康,有健康嘅體魄,先至可以實踐大計㗎嘛!2019豬年我哋繼續拍住上!
仲尼:承你貴言,我就梗係祝你愈嚟愈型,愈嚟愈紅啦,你最鍾意人哋讚你靚仔㗎嘛!話時話,聽講喺全港打工仔今日「初四咁嘅口面」復工嘅同時,你就同親戚朋友外遊噃!
Prof J:係呀,辛苦一整年,梗係好好鬆弛,再血拼購物一吓!
仲尼:講開購物,其實近幾個月好明顯見到香港嘅零售市道唔係咁好,例如喺星期五六黃金晚飯時間,竟然有唔少旺區餐廳唔使排隊,就可以即時入座;我同日式超市啲姐姐傾偈,佢哋都話喺歲晚期間,顧客冇早兩年咁爽手買嘢;最重要嘅指標,係我認識嘅一啲商場界人士透露,舊年聖誕同今年農曆新年嘅推廣同宣傳開支,就算唔使「咳筆直」都要凍結,可想而知而家個市係有啲暗湧!
Prof J:但係咁喎,正如一啲大陸旅客話齋,佢哋係嚟「振興經濟」,係香港嘅經濟支柱嚟㗎嘛,有佢哋嚟消費咪得囉。需知道舊年高鐵同港珠澳大橋通車之後,全年訪港旅客人次創咗6,515萬嘅新高,按年增加11.4%,其中淨係大陸旅客都佔咗5,104萬!呢班人喺香港零售界眼中,直頭係活生生嘅財神啦。
仲尼:你講到數據,我又想拎另一條數畀你睇吓。政府統計處最近公布,2018年12月零售業總銷貨價值為449億元,按年只係微升0.1%,除咗遠低於市場預期之外,大陸遊客至愛嘅珠寶首飾、鐘錶及名貴禮物銷貨價值仲下跌4.9%,咁係咪反映佢哋消費力低咗呢?仲有就係,電器及其他未分類耐用消費品嘅銷貨價值,更按年大跌15.2%。大陸客嚟香港買大型電器,我相信唔係主流,因為要運返去都幾麻煩,而且唔少國際品牌都係中國製造啦,呢條數較大機會係反映本地人嘅消費力,尤其是正值年尾,消費意欲傳統上會比較高漲,好多企業亦會出雙糧花紅,正係換雪櫃冷氣洗衣機、Upgrade電視同音響嘅好時節,但點解銷售表現反而跌咗咁多呢?
Prof J:呢樣就等我解釋吓啦,其實係同經濟理論有關嘅。喺經濟學上,可以長期使用至少三年嘅商品,例如電視、電腦、冷氣機、洗衣機同雪櫃,我哋稱之為「耐用品」,而「耐用品」嘅銷量同訂單,某程度上可以反映一個地方嘅民間消費力度,從而折射當地經濟前景。簡單一句,市民手頭鬆動,咪換密啲囉,追下新款咁;相反經濟唔好,市民預測未來收入可能減少,甚至連份工都唔穩陣,就梗係慳得就慳,唔會亂咁買耐用品,幾大用得幾耐就幾耐啦。
仲尼:根據呢個理論,如果比較返一年前嘅相同數據,相信你都會感到驚訝。喺2017年12月,電器產品與耐用品嘅銷貨價值,係分別按年上升12.2%及21%!即係話反映消費者對未來經濟前景睇法嘅呢項數據,喺短短一年內,由按年大升十幾廿個巴仙,變咗大跌15.2%(電器及其他耐用消費品合併計算),咁你話恐唔恐怖?我相信喺香港人心目中,應該都有一種「山雨欲來風滿樓」嘅感覺,準備勒緊荷包過2019年喇。
Prof J:唔出奇啦,我知道已經有唔少企業凍薪冇雙糧花紅兼裁員,相信打工仔要準備同老闆「同步過冬」!不過我都想知珠寶鐘錶嘅銷售表現點呢?係咪一齊插水?
仲尼:無錯呀,喺2017年12月,珠寶鐘錶及名貴禮物銷貨價值係按年上升6.3%,但一年後嘅12月,就變咗下跌4.9%喇,可能亦某程度上反映訪港旅客消費力都同步減弱咗,相信係同環球經濟增長放緩同中美貿易戰帶嚟嘅心理影響有關。
Prof J:坦白講,自從兩大基建啟用之後,廣東省居民落嚟就更便利,香港多咗好多嚟自大灣區嘅一日遊旅客,所以舊年不過夜嘅內地旅客人數,係按年大增20.1%,遠遠跑贏過夜內地旅客嘅7.4%。但當然,旅客太多,自然就逼爆咗東涌、上水、屯門、九龍站圓方呢啲接近口岸嘅地方,為附近居民帶來不便,更有人要求將現時大陸旅客嘅一周一行,變成一月一行,甚至一年一行!
仲尼:其實香港而家嘅旅遊業定位係好奇怪,一方面宣傳自己係亞洲國際都會,希望吸引歐美澳加日韓較高消費力嘅旅客,但另一方面又有大量基建,引嚟大量內地「即日鮮」水貨客,結果呢個只得1,100平方公里嘅小城市,每年竟然要承受6,515萬、相當於自己八九倍人口嘅旅客,除咗逼爆交通工具、搶貴舖租變晒藥房金行,仲搞到愈嚟愈多地區嘅民生受影響。大佬呀,你睇吓面積比香港大三百幾倍嘅日本,一年都只係大約有3,000萬遊客咋!但你話呢班即日鮮內地遊客消費力真係好高咩,又未必喎,你睇下啱啱提過嘅數字就知道,佢哋嘅消費力亦都下跌緊。如果用企業管治角度,當香港旅遊業係一間公司咁分析,咁究竟你想你啲客人係貴精,定係貴多先?如果收入貢獻有限嗰班客仔,係有機會嚴重影響公司生態,甚至破壞公司口碑,搞到其他大客戶流失嘅話,你又值唔值得為佢哋而犧牲咁多呢?睇返今日嘅香港,就算旅客人數年年破頂,咁又有咩意義呢?分分鐘只係得不償失!在位者,真係要好好諗一諗,係咪應該諗吓啲措施解決問題,而唔係將啲旅客疏導去全港十八區囉。

何文俊(仲尼)(逢周五見報)
《都市日報》財經主編,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!