2020年11月25日 

久別重逢 古天樂 宣萱

2019-10-17 (週四)

用「世間所有的相遇,都是久別重逢」來形容古天樂及宣萱這對好拍檔最適合不過。昔日的熒幕情侶自多年前拍畢電視劇《尋秦記》後,等到足足18年後由公仔箱跳到大銀幕再度合作,相信二人的粉絲們等到頸都長!雖然這次推出的不是集體回憶《尋秦記》電影版,而是電影《犯罪現場》搶先登場,但戲中古天樂首度挑戰做悍匪首領,宣萱則飾演視障人士,角色有噱頭之餘,二人更譜出一段似有還無的感情關係!

撰文:Anthony Cam|攝影:陸羽勝|服飾:Max Mara(宣萱)
髮型:Keith Wo @La Biostheque(宣萱)、Dan Tam @O4(古天樂)
化妝:Kamen Leung(宣萱)、Carman Man(古天樂)

古天樂(古仔)過往曾多次拍攝警匪片,相信這次拍攝電影理應駕輕就熟,但依然甚多新嘗試。如首度挑戰做悍匪首領,還要貼上假鬍鬚,拍攝當時又時值炎夏,問到他有沒有中暑,他笑說:「種樹就有,中暑就無,當時好辛苦,尤其是有一排喺石屋度追逐同槍戰」。以為打劫的槍戰戲對他會較易,古仔反而表示是最難的。「因為我哋想搵個實景搭嘅珠寶店,配合晒成個環境,喺街度有追逐同埋開槍爆破場面,但由於個景每日只係得7點搭到10點鐘,出面就熄晒燈,我又要開機關槍,所以要預先通知晒所有街坊,費事大家以為真係有劫案發生,想場戲呈現真實感多啲。」
假戲真做整親宣萱
古仔及宣萱在戲中有不少對手戲,當中不乏打鬥的戲分,更因拍攝時過於認真而不小心弄傷宣萱頸部!「本身嗰場戲係打算搵件風褸包住佢個頭撞埋牆撞暈,之後勒死佢,但導演話想唔分Shot,一個Shot做晒佢。」細心的古仔在拍攝前更溫馨提示宣萱,不論如何如若有事要即刻叫停,惟她又沒有表示需要暫停。想不到就此發生意外,令到宣萱的頸部意外受傷,要馬上敷冰及休息。
但見慣大場面的宣萱,毫不在意地說:「咁拍戲係咁㗎啦,有啲人條命係咁,又唔係重傷,只係Chok咗兩Chok,覺得最緊要係個鏡頭,出嚟嘅Shot靚就得!」她更表示早前曾在拍攝電影《使徒行者2》時,曾不小心弄傷手流血不止且痛到講不出聲,依家堅持繼續拍攝,全因導演一日未嗌Cut都不會停。「嗰時陳豪都走埋嚟,望住我隻手話流血喎,我就覺得反正都流咗血,咁咪做埋佢先。」在戲中飾演視障人士的宣萱,有別於昔日她曾在電視劇《彩色世界》飾演全盲的角色。「呢個只係弱視,仲睇到啲影,所以當係一個正常人角色就得,唔使刻意做畀觀眾睇,佢係睇唔到嘢,但某啲場面好似睇銀紙時,就要哄到好埋啦!」
再度合作更覺成熟
闊別18年後再次拍戲,二人不約而同表示隨着年紀的增長,變得更成熟,就連演技也有所轉變。古仔說:「可能年紀大咗,多咗份成熟,睇每件事都會唔同咗,由於今次同佢嘅戲分主要喺間屋入面發生,但啲戲分就未止到戲癮。如果係一部愛情片就會發揮得好啲。」至於宣萱則表示:「我覺得所有嘢係實咗嘅,對佢嚟講好駕輕就熟,唔需要再去諗去摸索,一嚟就做到㗎啦!以前做感情戲,佢話喊都喊到嘅,嗰份成熟係人生經歷多咗,好自然演繹方法都唔同咗。」
始終警匪片都是以刺激場面作主菜,愛情戲分永遠只是配菜,故場面也只能點到即止,但宣萱反而認為這是最有趣的地方。「開頭淨係覺得古仔好得意,我又貪錢,好多嘢佢又畀,但好多嘢又唔出聲。兩個人之間好似有啲嘢,但又好似唔係,去到尾聲你可以話係,係有啲感覺但又未到。因為真係無嘢發生導致到可以有嘢發生,呢套戲我覺得最鍾意就係呢樣嘢。」似有還無的愛情向來吊癮,作為觀眾還能不看到心癢癢嗎?