娛樂

2017年4月29日

2017/04/21 (週五) 12:00上午

Weekend 捱出頭 吳卓羲

在無綫打拼15年的吳卓羲前年約滿後,將事業重心轉移往內地市場,工作與身價均向上飆升!早前更有幸夥劉德華演出新片《拆彈專家》,面對一眾資深電影人,入行近20年的他亦抱住新人心態,虛心學習。離巢後發展不俗,昔日未獲無綫重用的吳卓羲卻未有介懷,反而感激娘家培訓,令他在內地也很吃香!至於愛情方面,Dry足多年的吳卓羲就好羨慕鄭嘉穎,仲希望搵個靚女友,而「靚」的定義是指「內在美」喎!實係啦!

撰文:黎寶倫
攝影:L
場地:Orange Elephant Thai Restaurant (Barry@J&B Ent)

現年37歲的吳卓羲(Ron)拍畢台慶劇《梟雄》後, 前年跟無綫正式結束15年的賓主關係,轉攻內地市場後,不論其工作、人氣或酬勞均直線向上飆升,事業發展一帆風順!相隔5年後,他亦再次重登大銀幕,夥拍天王劉德華、姜皓文(黑仔)主演邱禮濤執導的警匪片《拆彈專家》。
影壇新人
回想17年前於無綫擔任舞蹈員時,Ron早已在慈善騷為華仔的演出伴舞,誰料到多年後二人竟合演對手戲!此次《拆》斥資1.8億製作費,更耗時兩個月搭建「紅隧」實境拍攝。面對如此大製作及卡士,入行近20年的Ron不禁自認初哥,更笑言睇到條「A貨紅隧」已經唔記得演戲,但從華仔、黑仔及邱導等身上亦汲取了許多經驗,「我仲係新人嚟㗎,因為電視劇同電影係兩樣嘢,好多嘢學緊。參與咁大型嘅製作好新奇,好似以前初初拍電視劇咁,咩都要望,睇吓人哋點做、拍攝模式係點,依家就將以前個心態擺番喺電影度學嘢。」
獲網友封為「御用差人」的Ron,屢於無綫劇中飾演警察角色,而今次《拆》片也不例外,扮演爆炸品處理課警員的他笑謂:「其實每個警察部門工種都唔一樣,每拍一部戲去受訓嘅嘢都唔同。厭未?水警、交通警我都未做!」Ron又盼日後拍更多電影,即使賺少一點「人仔」他亦冇所謂,「我唔一定以賺錢為大前提,只要接到好劇本、好角色,畀人認同賺到嘅多過賺嘅錢,當然我唔虛偽,錢都係緊要。」

感激無綫
相比效力無綫的10多年,離巢後的Ron明顯愈撈愈掂,所參演的內地劇《最佳前男友》、《幸福歸來》等均叫好叫座。其實早於10年,他已憑《大丫鬟》分別奪得南方電視「最受歡迎港台男演員」及「有線視帝」,僅於04年在台慶頒獎禮獲得「本年度我最喜愛飛躍進步男藝員」的Ron,到後期於無綫劇中更由一線貶為男配角,不少網友都戥他不值。 然而Ron卻沒有介懷,「我覺得角色有發揮就冇問題,又唔會可惜嘅,我依家幾好呀,有得有失嘅,你得到嘅可能係一個經驗,日後就知道要更加努力。」
無綫向來有「木人巷」之稱,藝人連日直踩20多小時拍劇乃家常便飯,因此無綫訓練出來的演員都非常捱得,即使跟積極主動的內地演員比較也不失競爭力,就連Ron亦很認同,「你必定要捱得先可以喺TVB工作到,TVB嘅人出到去係吃香,因為我哋刻苦耐勞、冇所謂,即使夠鐘收工,導演再叫我哋拍多啲,我哋都覺得冇問題,最好拍多啲,因為之後點都要再拍。」
鍾情靚女
稍後將返娘家拍網劇《飛虎極戰》,預計Ron頭半年均留港工作,換言之將有更多時間陪家人。雖然吳媽媽多番明示、暗示恨抱孫,但他每次都以冇時間識女仔為由Hea過,其實孝順仔Ron是希望多留家中陪老人家,「我唔鍾意出街,一出街就工作,以前喺TVB真係冇乜時間陪家人,依家出咗嚟自己分配時間會好啲,希望抽多啲時間同媽咪拍拖。」不過見好友一個接一個結婚,Ron也幻想過自己有家室、有小朋友的畫面。
要成家立室,先要條件是找到另一半,以Ron的靚仔樣相信吸引不少女生埋身,可是他卻大呻:「唉,冇呀,我都唔覺得自己靚仔。」11年底,Ron的微博遭舊愛張馨予貼上「牀照」令戀情曝光,事實上,藝人被「地下情人」洩密宣示主權等事經常發生,一向低調的Ron又會否抗拒再跟圈內人拍拖呢?他說:「我唔會界定要搵邊款、做乜行業嘅女仔,最緊要有共同嗜好,諗法都好緊要,最好靚啦!我心目中嘅靚係內在美。」提到鄭嘉穎與相差22歲的陳凱琳拍拖,正所謂「戀愛無界限」,Ron也直言好羨慕:「開心咪得囉,你睇佢幾開心!」