新聞

2019年1月18日

2019/01/11 (週五) 12:03上午

NEWS力場 蘭花瀑布有得睇 鍍金郵票賀豬年

仲有唔夠一個月就係農曆豬年啦!香港郵政明日就會推出一系列以「歲次己亥(豬年)」為主題嘅郵票,當中價值100蚊嘅「十二生肖金銀郵票小型張——靈犬寶豬」,係用22K鍍金金片嵌製「寶豬」圖案,同用銀箔燙印「靈犬」身上斑點,寓意送舊迎新,郵票仲附有黃色成色證明書,好有收藏價值㗎!

「金豬」郵票夠搶眼

今趟亦推出四年一次嘅「銀箔燙壓生肖郵票」,集合「猴、雞、狗、豬」四種生肖,象徵「小團圓」,銀箔表面睇落去閃閃生輝,極具立體感。對上一次「大聚集」已經係龍年囉。

仲有一款「郵票小型張」雕有金色絲綢 「金豬」,背景綴以粉紅牡丹,望落相當雍容華貴,都幾搶眼㗎!香港郵政高級經理(集郵推廣)李振宇仲話,呢張面值50蚊嘅郵票係真絲嚟㗎!

過年唔少得年花,鍾意蘭花嘅朋友便咪錯過將軍澳東港城嘅新春花展會,有全港首個逾2米高嘅蘭花瀑布呀!「蘭花大王」楊小龍話去年超強颱風「山竹」摧毀咗幾百棵蘭花,好彩今年天氣回暖,影響唔太大,佢仲話香港經濟今年雖然增長放緩,但點差都唔會吝嗇買一棵蘭花嘅錢喎。

龍哥又「教路」,買蘭花要留意「花冧」,「淨番兩個花冧係最靚」。堪輿學家麥玲玲亦指點話買蓮花可以催財,想桃花運就放西面,添丁就放西北面喎。