新聞

2019年5月27日

2018/03/16 (週五) 12:26上午

NEWS力場 建制「磨刀霍霍」爭九西 經民聯舉手 派梯隊「上位」

民建聯嘅鄭泳舜喺3.11補選,為建制派取得「零的突破」、即將會宣誓為九西立法會議員。小記聽聞,建制及泛民都分別開始物色人選,角逐因劉小麗被DQ而懸空的九龍西議席。

早前有政界消息估計,堪稱工聯會「戰將」、人稱「午餐肉」嘅王國興,會重出江湖力戰九西。不過,小記就聽到另一版本,就係經民聯「好有興趣」並且已經率先舉手,希望培訓第二梯隊上位囉!

無可否認,「午餐肉」喺全港知名度係相當高企,但有建制花生友同小記講,今次「阿舜的故事」正正證明一樣嘢,就係地區樁腳(區議員)好重要;而阿舜所屬嘅民建聯喺九西有21隻樁腳,喺建制陣營最強大;其次就係由鼠王芬(梁美芬)帶領嘅經民聯,有12隻九西樁腳。

至於工聯會呢?答案就係得0.5隻樁腳!事關唯一一名九西區議員、就係喺2015年打敗民協阿基嘅陳穎欣,而呢位「小花」其實都孭緊民記牌頭。

工記得「半隻腳」 啟德助「舜間勝選」

花生友就話,阿舜今次成功「爆冷」,另一個重要原因係由經民聯擔大旗嘅啟德北、啟德南,兩個小區已經令阿舜大勝姚松炎一千七百票,所以經民聯大有道理「舉手」囉!依家唔少建制人士對喺九西再拎多席有啲期望,每個政團自然都唔想「肥水流向別人田」,相信都要等「上帝之手」幫手協調啦!

;