新聞

2019年4月23日

2018/02/23 (週五) 12:19上午

NEWS力場 容海恩感情「見光死」?Alice自薦做「電燈膽」

早前有術數師幫咗幾位單身立法會女議員計吓狗年會唔會有桃花運。

盛傳同緊袁彌昌「行埋一齊」嘅新民黨容海恩(Eunice),就被批桃花運會「見光死」喎!

曾經自言「有生之年一世都唔會享受產假」嘅工聯會麥美娟(Alice),就被計到喺2020年會出現姻緣喎!

Alice就話,自己已經叫晒朋友準備定做人情,萬一2020年嫁唔出嘅話,都可以當係「慰問金」㗎!

講到Eunice嘅桃花有機會「見光死」,Alice就自薦幫佢「做掩護」,到時食飯都叫埋佢一齊去,咁3個人同枱就唔怕啦!

嚟緊下個禮拜三就係財爺公布財政預算案,Alice就話相當關注少數族群朋友嘅就學,同埋就業支援啦!喺葵青區幼稚園擔任校長嘅林翠玲話,政府只會為取錄咗8名或以上嘅非華語兒童嘅幼稚園發放額外資助,但其實有唔少幼稚園都有取錄幾位嘅非華語兒童囉!

倡設「少數族裔就業科」

項目幹事Hussain就話,少數族裔喺就業時都遇到唔少困難,例如本身應徵經理,但因唔識中文只能夠做清潔工人囉!Alice就話,政府應該撥款喺勞工處設立「少數族裔就業科」,幫佢哋求職同配對工作嘛!