新聞

2018年12月20日

2016/12/01 (週四) 12:50上午

NEWS力場 天文台長行山頂 話要搵番扯旗位

天文台噚日搞咗個午宴,邀請小記們傾吓極端天氣嘅影響,台長岑智明就拎出成寸厚嘅舊照,部分仲有過百年歷史!台長笑話閒時愛考古、收藏同天氣有關嘅歷史物品,事關相片一睇就明,可了解當年嘅社會面貌,而其中有一個地點,仲原來係百年冇變添!

台長透露,考古朋友經常同佢爭論一張1874年攝嘅太平山照片,「我認為佢係記錄咗香港開埠以嚟嘅『甲戌風災』,但佢哋就同我嘈話唔係喎!」佢解釋,太平山被人俗稱「扯旗山」,係因當年未有天文台,啲人自行喺山頂扯旗測風,「如果仔細睇張照,可以見到個扯旗杆個位斷咗㗎!」

為咗證明自己正確,台長上年開始睇地圖,行山對山勢,決定要搵番當年個扯旗位置。「行到上去,原來有咁多個山頭,最後發現個位變咗無線電信號站,閒人免進。」佢話好彩入面有幾個天文台設備,令佢可以入到去,點知覺得不得了,「同張相一樣,個位可以睇晒成個維港景色,咁靚嘅景梗係唔好嘥」,即刻叫人喺度加裝攝影機拍攝實時照片,又笑言「旅發局都應該要多謝我!」