娛樂

2017年8月20日

2017/02/17 (週五) 12:00上午

馬國明生日畀女圍 黃心穎避席

日前馬國明同黃心穎孖公仔去睇戲,令緋聞甚囂塵上,適逢男方幾日前生日,雖然要開工,但就有成班《深宮計》靚女陪慶生,咁黃心穎呢?冇影喎!不過有周刊就爆料指兩人上周去撐枱腳,一早已慶祝情人節同生日,唔怪得啦!

本月13日是馬國明43歲生日,雖然在工作中度過,但拍攝劇集《深宮計》期間,上至皇后,下至宮女近20個女藝人都圍住他切蛋糕,連舊愛胡定欣都在場。不過在劇中跟馬明有感情線的黃心穎竟然冇影,唔通玩避席?原來一早慶祝咗!有周刊影到兩人上星期去銅鑼灣開餐,有傳是慶祝馬明生日及情人節,一向慳家的馬明更豪使2千蚊請食飯,出手好闊綽!不過他繼續向傳媒否認拍拖,被問為何心穎沒有跟劇組陪他慶生,馬明說:「好簡單啫,嗰日場戲都冇佢。」而女方亦夾口供表示當日另有工作,但都有同馬明講生日快樂,咁有冇講情人節快樂?心穎即詐傻謂:「冇喎,做乜要特登同佢講呀?我有喺網上開Post同大家講啦!」