娛樂

2018年11月13日

2018/09/14 (週五) 12:00上午

都騰點評 再戰江湖 戴龍師傅

電影《食神》上映至今時隔20多年,早已成為神級經典電影。賣點當然是主角周星馳(星爺),但紅花雖好也要靠一眾綠葉扶持。當中的火雞姐、夢遺大師及薛家燕飾演的評判等令人印象難忘!但說到最厲害的綠葉,不得不提到在戲中飾演大龍鳳酒樓總廚的戴龍師傅!現實生活中的他是鼎鼎大名的香港四大名廚之一,亦是《食神》主角的原型人物。事隔多年後戴龍師傅強勢復出,為新開的CHOP CHOP食神叉燒擔任顧問,推出當年在電影由他一手原創的黯然銷魂飯。

撰文:甘偉丁
攝影:Jonas

講起「斬料」加餸,當然首選吃叉燒!燒味店總有一間開在附近,CHOP CHOP 食神叉燒在戴龍師傅的加持下,與傳統燒味店有甚麼不同?「我哋將燒味做得有營養啲,一定要揀新鮮豬肉,出爐後唔好擺得太耐,因為過咗兩個鐘就唔好食!我哋喺中午要燒4次,夜晚都要燒3次,因為坊間好多燒味店都係一早燒好就擺到兩三點!叉燒醃足8小時,朝早醃咗就夜晚用。一定要用天然色素,最緊要用心整,燒到有啲焦香先叫係靚叉燒。」
不少人吃叉燒都有要求,肥叉燒、瘦叉燒或半肥瘦,各有喜好。但戴龍師傅表示:「我就最鍾意半肥瘦叉燒,因為口感好啲!黯然銷魂飯嘅叉燒會用脢頭肉,而食神玫瑰叉燒我就鍾意用五花腩,同埋要用高度玫瑰露醃製先好食。」

黯然銷魂飯
黯然銷魂飯當初源自於電影中的比賽菜式,到底如何構思得來?「呢個名唔係我諗,係星爺諗㗎!嗰時劉德華有套《神雕俠侶》,佢喺戲入面研究到黯然銷魂掌,就咁得名!佢仲要求我睇吓點樣將個叉燒做到好特別。」但一問到星爺是不是很難服侍?戴龍師傅笑說:「呢個見仁見智啦!」黯然銷魂飯作為招牌名物,經過多年後有沒有改良過?戴龍師傅說:「當然有啦,依家用50幾度嘅高酒精玫瑰露酒醃脢頭肉做叉燒,仲會揀黑龍江五常米,因為呢隻米以前係貢品,每年只係出一次,食落飯味特別清香。同埋依家嘅天然醬汁比以前仲靚咗,係用天然發酵兩年嘅豉油。」
多得電影多年來不斷重播,這人氣名物紅到今時今日,坊間不少餐廳亦有推出向電影致敬,問到戴龍師傅有沒有試過?他則謙虛地說:「我都有食過,各有各做,自己就唔評價啦,留番比消費者去評價就最公道 。」戴龍師傅差不多有20年時間沒在香港出現,原來這段日子和不少藝人一樣忙於北上發展。「我依家主力喺大陸發展,以前我就打理高級中菜館,依家喺深圳都有間高級會所。不過我半退休唔敢做咁多嘢啦,咁啱老闆曾小姐係我好朋友,大家識咗20幾年,佢話想搞燒味店,如果我唔幫佢就唔開。呢度負責嘅師傅已有20幾年經驗,以前都係跟我做過嘢,但係我大佢幾十年,我見識嘅嘢同思維梗係高過佢啦,舖頭所有嘅出品都經過我畫龍點睛!」言談間盡顯老派師傅的霸氣本色!

相傳《食神》以戴龍師傅的原型做故事藍本,問到是否屬實,他笑說:「呢個唔敢當,大約三分一啦!我覺得性格、執着、點樣做好件事呢幾方面最似。」原來當年與星爺結緣因為戴龍師傅在一間五星酒店中菜館工作,不少富商名人如李嘉誠、潘迪生及張國榮等均是他的座上客,星爺亦是其中一位。問到現時還有與星爺聯絡嗎?「依家好少啦,但幾年前有喺北京見過面。」
但作為香港四大名廚之一,想不到他會放下廚師身份,將事業版圖延伸到娛樂圈,發展人生第二春。除人人皆知的《食神》外,還有《喜劇之王》及《行運一條龍》也有客串演出。皆因被星爺的一句:「師傅,你都可以客串吓嘅!」決定處男下海拍戲,但相信最令人記得就是《喜劇之王》龍少一角「初戀呀,我要初戀呀!」至今仍被不少網友惡搞CAP圖及做表情包,在網上老是常出現,師傅聽後笑說:「係咩?我唔知喎!我當年都冇初戀過,相睇完就飛咗去印尼做嘢,3年嚟只係靠每個月一封書信同老婆通訊。 」
但當被問到如果再有人邀請拍戲,戴師傅隨即耍手擰頭說:「最近都有人搵我拍戲,我話唔啦,做咗咁多年廚師有啲名氣!喺大陸興靠名氣食飯,依家做番自己好舒服呀!同埋拍電影都好辛苦。」看來想要師傅的演出,還是要重看星爺的電影才可以。
不說不知,原來戴龍師傅已年屆70歲,但說話中氣十足,面色紅潤,看起來最多似60歲左右。原來全靠養生!「我煮嘢食煮咗幾十年,冇用過味精雞精,全部都係天然嘢,我好保護自己㗎!平時會做掌上壓、拉筋同埋跑步,好感恩呢個年紀都冇咩病痛。同埋做人要開心,佛家話要捨得,唔好貪心,我依家都仔大女大,喺呢行又做咗50幾年,好開心㗎啦。」做人能夠做到如此豁達開通,難怪活到70歲依然活力十足!

CHOP CHOP食神叉燒
地址:北角炮台山宏安道18號地下3號舖
電話:3618 7718
營業時間:11:00-21:00