副刊

2019年3月19日

2019/03/15 (週五) 12:00上午

都市點評 酒釀美人 羅霖

人經常會被不同事物標籤及規限,如雙十年華等於青春,年近半百等於中年,但相信年齡對於「美魔女」羅霖來說就沒任何限制,她曾在3年前推出首本個人寫真《Timeless》,以凍齡面貌及身材引來全城熱話。「嗰時出並唔代表我個樣或身材無時間限制,只係想講理想同目標係無時間限制,50歲都可以出到寫真,代表任何嘢都係有決心就可以做到。」羅霖近年除忙於演藝工作外,亦有投身酒品生意,加入馬伯樂酒業擔任市場推廣的工作,並以寫真之名推出同名紅酒,以杯中物延伸Timeless的真諦。

撰文:甘偉丁|攝影:ChaseK

《亞洲小姐》出身的羅霖,可謂是亞姐的經典Icon之一。但她與酒的緣分始於當年做空中小姐,直言小時候只喝過啤酒,但多得以前的空姐工作令她大開眼界。「上堂前Training School嘅老師就會講,聽日會試晒飛機上面所有酒,本來我哋6點鐘放學㗎,但有啲人會醉咗瞓覺,起碼要1點鐘先走。由頭等艙至到經濟艙嘅酒,每隻試一啖都好厲害㗎啦!因為佢會有Baileys、甜酒、Gin等,我哋又要喺頭等學點樣溝酒整Cocktail,但因為會調嚟調去,所以咩都要學識晒。嗰時係我第一次飲酒,仲要一飲就要咁多隻。」其後,她參選《亞洲小姐》獲得冠軍後,曾為亞視拍攝過一系列《乜都有》的旅遊特輯,遠赴美國及法國等地拍攝。「嗰時喺法國酒莊拍釀酒過程,學咗好多嘢,亦都對酒愈來愈有興趣。」

Timeless代表永恆的愛
2013年羅霖為亞視拍攝《Miss Asia 25th瑰麗巡迴》旅遊特輯,因節目得到馬伯樂酒業的贊助,因緣際會下認識了老闆及老闆娘。「佢哋帶我哋去葡萄牙同埋法國拍酒莊,嗰時10月去,喺葡萄牙天氣好好,一路飲紅酒一路食Snack,覺得好減壓好舒適,因為靚酒係會愈飲愈開心。之後返嚟老闆娘Angel就問我有冇興趣一齊做。於是就加入公司成為一分子至今已接近5年。」自己有甚麼工作要負責?「有時有老闆嚟,我哋要招呼佢,Marketing方面都要幫手做,有好多Event要搞,因為同美心集團有好多合作,所以有好多活動我哋都會參與,另外仲要試酒,有時都要飛過去酒莊,但我比較忙少去,多數係老闆娘親自過去。」
羅霖表示公司代理5個酒莊,有齊香檳、紅、白酒、XO同甜酒,數牌子名都多達百幾款,但她特別喜歡3款以Timeless之名推出的酒。「因為Timeless係有意思㗎,用喺酒度即係代表永恆的愛,所以我會用粉紅色來包裝紅酒,好多我身邊嘅朋友結婚或者係結婚周年紀念,佢哋都會好鍾意呢款酒,代表愛咁解。」3款酒到底有何分別?「黑色樽蓋嗰隻價錢會平啲,適合婚宴,因為佢唔需要抖氣可以即刻飲。金色樽蓋嗰支就係法國古堡紅酒,要抖氣約20分鐘先至好飲,嗰時我去過當地拍嘢,了解過嗰度嘅土壤特別多花青素,所以釀製葡萄嘅花青素都會高啲,飲咗對皮膚都會好啲。至於白酒嗰支就果香好濃郁,甜啲嘅。」
紅酒價錢有如海鮮價般,但羅霖笑說公司的酒價錢合理,只需幾百元即可,人人都能負擔。「仲有隻天使紅酒都好好飲,因為我揀紅酒唔鍾意太Dry。我介紹畀人,個個都話好㗎!酒以往通常都係配西餐,但其實依家好多中菜會配紅酒,所以我哋喺呢方面都推廣好多。」
駐顏有術的秘方
但好奇的是羅霖既要忙於娛樂圈工作,又要擔任酒品公司的工作,不知道她如何分配時間?「公司對我好好㗎,知道我係娛樂圈嘅工作唔定時,佢哋好多時都會就我,會預早一兩個月問我啲期,我拍檔真係好好!我都要返公司處理自己啲嘢,因為有時啲嘢喺屋企係做唔到。做酒係一門愈做愈開心嘅生意,內地需要好多酒,但3年前有個政策話要打擊奢侈品後就難做少少,但係香港因為有同啲集團合作,所以生意都好穩定。」另外,她又笑說因工作而結識很多朋友。「大家完全無利益衝突,一齊食飯會好開心,飲咗酒之後就會打開話題,當然唔好飲太多,適可而止,小量係對身體好嘅!」
羅霖認為紅酒好處甚多,每個星期平均飲3次左右。「如果食飯同朋友出去一定會飲,喺屋企瞓唔着我先會飲少少,屋企都有齊紅、白酒、香檳同XO,需要起上嚟隨時都有得用,自己比較鍾意飲紅酒,因為佢有抗氧化,飲咗會靚啲。」保養得宜是否全靠飲得多紅酒?「呢個係一小部分,其他靠運動、飲食點樣少食多餐,皮膚方面你點用護膚品同保濕,好多嘢加埋嘅。保養我最着重皮膚,平時如果唔使做嘢,盡量唔化妝,會敷多啲 Mask,護膚品亦要揀我自己啱嘅,仲有一個秘訣就係我全年都用凍水洗臉,可以收縮毛孔。」對保養如此講究,絕對靚得有道理!

Info:http://www.mbl.hk/zh-hk