娛樂

2019年3月19日

2019/03/15 (週五) 12:00上午

追求突破 甄子丹

甄子丹憑着好身手,接拍多套電影,包括《葉問》系列而為人熟悉,甚至衝出亞洲打入荷李活市場,但原來甄子丹對馬匹亦情有獨鍾,連續擔任7年《香港打吡大賽》大使的他表示,無論做演員還是馬匹都要有拚搏精神!

撰文:卓妙燕|採訪:黎寶倫
攝影:ChaseK|髮型:Kenji Ng@ IL COLPO(PP)
化妝:littlewhite |造型:Harrylam
鞋履:Hogan |場地:香港賽馬會

愛馬之人甄子丹第7次為《香港打吡大賽》擔任大使,他指自己是一個很喜歡馬匹的人,與牠們也很有緣分,「我拍戲成日騎馬,同馬好有緣,賽馬都係香港歷史嘅一部分,係香港文化嚟,我自己好榮幸7年都作為佢哋嘅大使。」對甄子丹來說,打吡大賽贏錢不是重點,而是那份氣氛,「好玩在全民可以參與啦,唔係贏錢咁膚淺囉,係一個大Party嚟,嗰份刺激,睇緊衝刺嗰吓係好過癮!」

把握機會
甄子丹名下的愛駒「宇宙車神」早前已退役,他坦言有意再抽新馬,「依家考慮緊,因為買隻馬唔係困難,但真係要花時間同畀心機去關注你隻馬,我成日飛嚟飛去,所以遲遲都未有大決定。」至於問到會否讓兩位寶貝子女學馬術,他說在外國時二人已試過騎馬,「香港小朋友比較忙,好多功課要做,未有機會畀到佢哋學真正嘅馬術,反而我哋有好多次喺紐西蘭都有帶佢哋去騎馬,咁有個馬伕會拖住。」
作為馬主還是演員都需要有嚴謹和拚搏精神,他更要求自己任何事都要做到最好,「一係唔做,一係就要做到最好,如果唔係我會覺得好似浪費生命咁!同打吡精神一樣,因為咁珍貴得一次機會,喺佢(馬匹)一生之中只可以跑一次,所以嗰個機會你唔可以放棄,真係要全力以赴!」身為動作演員的甄子丹,對他來說最困難的是節食,他笑說:「始終我有Family同小朋友,小朋友梗係鍾意咩都食吓,我自己又為食,所以個控制係最大嘅難度。」因此,他表示平時如有飯局和應酬,其他餐會少食一些,盡量平衡節制飲食。

依舊甜蜜
近年甄子丹接拍不少片,但由於自己要求高,故每部電影的拍攝過程都不易,「每部戲嘅難度係你自己去Set個Level,你對自己要求唔好,Hea啲咪唔辛苦。但我唔係嗰種性格,所以每部戲都會好辛苦,因為我要追求突破!」雖然辛苦但甄子丹從沒想過放棄,「正如人會工作、食飯、生活,冇理由會停,除非個人死咗!偷懶每個人都會但只係短暫,偷完懶都會繼續行落去。」
面對壓力,除了會彈琴抒壓,平時他更愛跟着太太汪詩詩周圍走,「太太有好多朋友,今晚去邊個飯局咪跟住去,去食飯咪飲兩杯紅酒減壓。我唔當係應酬,直情係當陪佢拍緊拖!拍拖係兩個人相處搵到嗰份溫暖,個溫暖唔一定每次都係激情。」除了太太,一對子女亦對甄子丹很重要,不過兩人漸漸長大,囡囡亦變得更有自己性格,而囝囝也一直練跆拳道和巴西柔術,亦變得愈來愈Man,至於會否介意兒子入行跟隨他的步伐,甄子丹笑言:「讀好書先再講!」