娛樂

2017年6月28日

2017/06/19 (週一) 12:00上午

迪士尼新酒店過父親節 黃浩獲大女送手繪卡

昨天是父親節,出名是廿四孝父母的黃浩及徐菁遙(前名:徐淑敏),趁住三個寶貝女放假,就去到上月新開幕的迪士尼探索家度假酒店度過兩日一夜,一家五口大讚酒店服務令人賓至如歸,玩得非常開心,而大女Vianna更送上親自填色的米奇畫作做父親節禮物,氹到爸爸好冧!

迪士尼探索家度假酒店上月開幕,剛過去的周末,黃浩(Kenny)、徐菁遙(Suki)就帶同三個囡囡Vianna、Renee及Isabella入住,順道慶祝父親節。一般新酒店開張初期都難免有小錯漏,難得住盡全球靚酒店的Kenny卻對這間酒店的服務讚口不絕,他說:「我對酒店都幾有要求㗎,新酒店服務通常都差少少,但今次呢間服務又好、個View又好,又乾淨,啲嘢食又好食,值得推介!」一家人在周六晚去了中菜館雲龍軒用膳, Kenny大讚其菜餚做得出色,其間米奇和米妮以探索家造型現身,三個囡囡立即嚷着要來張大合照。
此外,Kenny一向是「超級英雄」迷,迪士尼的「Marvel夏日超級英雄」主題活動上周開始,可惜因天雨關係,Kenny一家行程臨時有變,改為去東涌Shopping,Suki更送了銀包、太陽眼鏡及護照套等共十幾份禮物畀老公,Kenny幸福地表示:「呢兩日連食飯都唔使我埋單,一毫子都冇用過呀!」

三女爭住攬爸爸
老婆Suki就相當識做,未知幾個寶貝女又有何表示呢?Kenny透露:「佢哋一夠12點就講Happy Father’s Day,一起身又講,爭住攬我同要我抱。」7歲的Vianna不單送上親自填色的米奇和米妮賀卡做禮物,又自行加上心心和彩虹等圖案,盡顯藝術天分。但講到二女Renee和細女Isabella的禮物,Kenny就笑言:「二女話份禮物漏咗喺屋企,細女就話漏咗喺學校,應該都係啲手作仔嚟。我睇到啲嘢啱,都有叫佢哋買畀我呀,點知啲女竟然話:『我冇帶銀包呀,冇錢喺身。』哈哈!」