娛樂

2018年11月15日

2018/07/13 (週五) 12:00上午

走火入魔 陳展鵬

不聽老人言吃虧在眼前,16年尾才榮升視帝的陳展鵬,想不到於數周後,為拍無綫劇《天命》犯禁瞓棺材,搞到黑氣纏身!面對接二連三的是非新聞,他卻看得非常開,「人有三衰六旺,唔理件事真定假,你都要慢慢學識點處理,因為有新聞價值人哋先寫你啫,最緊要唔好影響到我周邊嘅人……」若外間要抹黑或攻擊,他都寧願獨力承受,誓死保護家人和女友單文柔。
然而,網上愈來愈多人說話不負責任,陳展鵬就希望大家互相尊重,盡量對事不對人。不過自己有錯當然要認,所以即使被大眾批評時裝品味,他都大方承認「走火入魔」兼娘到爆,仲虛心受教,細閱網民的意見。{文轉p60}

撰文:黎寶倫
攝影:ChaseK
髮型:Bowie Lo@FIFTH SALON
化妝:Jennifer Yip

到底這一年多以來,陳展鵬的運勢如何呢?姑勿論演藝成績好與壞,但自從於17年農曆新年期間,為無綫劇《天命》拍瞓棺材戲後,陳展鵬便一直是非不絕,先是去年初密會單文柔遭撞破而發生交通意外,繼而被判不小心駕駛;到今年5月,他因為一張「P過龍」的內地宣傳海報,慘被網友質疑「變臉」,早前又無故惹上「租霸」指摘,可謂鑊鑊新鮮鑊鑊甘,連他也不禁自嘲:「諗住升官發財,點知就官司纏身。」

沉默不再
既然黑到出汁,陳展鵬亦不敢再趁新正頭犯禁,「雖然好似好老土,但有啲至理名言真係唔好唔信。問題係要嚟始終要嚟,你點樣將佢大事化小、小事化無呢?人一定有三衰六旺,我拍完《城寨英雄》都估唔到咁受歡迎,好似發緊場夢咁,其實由亞視戇居居入嚟TVB做路人甲乙,到依家咁樣已經好好,咁三衰嘅時候都要受一受,古語有云,人紅就是非多嘛,做幕前一定有不足或處理得唔好嘅地方,先會引起咁多轟動,你有新聞價值先寫你啫,正常嘅,咪慢慢學識點處理囉。」
好在睇得化,由最初萬大事以不應作回應,到現在一切侃侃而談,全因他終於明白娛樂圈的遊戲規則,「以前覺得沉默是金,依家真係唔可以每件事都沉默是金,因為有好多唔同變化,同埋已經唔似以前讀書咁,教你尊重人、唔可以挖人瘡疤、屈人、踐踏人,依家啲人係誇張到不得了,咁我都唔係要去迎合呢個時代,但要知道玩緊乜嘢遊戲,喺適當嘅時候行出嚟講嘢。」

品味培養
正所謂「錯就要認,打就要企定」,陳展鵬都認為自己有錯就要檢討,就如早前頻頻被譏「時裝車禍」,他坦認:「着衫真係我弱項,因為我唔係好講究,我會覺得Brad Pitt、Johnny Depp、Leonardo Dicaprio好健碩、滿面鬍鬚、個頭好亂咁好Man,佢哋就算去頒獎禮都着到好似70年代咁,所以最緊要係形象健康,踢拖都會好有型。」惜隨人氣上升,亮相機會愈來愈多的他才發現,這種「隨性Look」不符合港人口味,於是先後請了3位形象指導打救自己。
結果怎樣?還是負評如潮。陳展鵬稱一切只怪自己Carry不起時尚潮流的造型,他續道:「呢幾年都發覺自己走火入魔, 頒獎禮個個啲衫靚到好似去Ballroom咁,你吓吓着黑西裝係穩陣,但好悶囉,跟住就開始嚟料,愈搞愈衰。」現時除了靠自己外,還會找單文柔擔任Stylist,「佢啲Taste好啲,我依家仲學緊,學習階段梗會錯㗎啦,所以我冇介意人哋批評,只係着啱咗都有啲驚啫,其實我都會睇網友嘅意見,好定唔好,相信佢哋唔會呃我。」

興趣行先
品味方面不斷求進步,那麼事業上可恨有突破呢?今次跟譚俊彥、張國強合拍《天命》,可謂過足戲癮,陳展鵬也自言是從影以來最近乎「零瑕疵」的作品。事實上,現時內地的古裝劇製作更用心,可曾想過北上闖一闖?三番四次獲敲門拍電視劇、網劇及電影,就算出價7位數僅拍30日,至今仍不為所動的他說:「錢係重要,但都要啱先得㗎,我好難要求人哋畀咩劇本、角色我,好多嘢自己都控制唔到,反而依家可以向TVB提議。同埋,一直以來好多監製都畀機會我,呢3、4年都做到自己想做嘅嘢。」
「咁你話北上兩、三年打個底,啲錢可以買到兩層樓喎,我覺得都緊要嘅,但又覺得自己都未死!我喺呢行咁耐都唔係為錢㗎啦,如果要搵錢都唔使堅持到依家,直頭轉行啦,最緊要自己係咪做到想做嘅嘢啫,我做緊演員、娛樂圈就唔可以太過同錢掛鈎,如果同錢作對,你就會好辛苦。」說到這話題,陳展鵬便猶如滔滔江水,連綿不絕。簡單來說,他就是希望踏實地一步一步邁向自己的目標,錢嘛,容後再談吧!