娛樂

2017年6月23日

2017/04/21 (週五) 12:00上午

羽球魔力 黎諾懿 張達倫

自從出演大台處境劇《愛.回家》後,「馬壯」黎諾懿、「嚴謹」張達倫兩位不但人氣急升,連戲外都變得老友鬼鬼。雖然藝人生活繁忙,但原來他們不約而同都是羽毛球發燒友,更大爆娛圈中人酷愛羽毛球,締造不少姻緣!

黎諾懿和張達倫兩人均打了羽毛球超過10年,算得上是經驗老手。黎諾懿笑稱自己是典型雙子座,容易半途而廢,惟獨羽毛球有這魔力,令他無論隔幾多年都能重執球拍。「以前細個嗰陣算係打過吓,直到10年前我同埋鄭伊健、蒙嘉慧佢哋,仲有一班港隊嘅朋友一齊打,跟住就打番。」張達倫則指以前喜歡踢足球,但成長後很難約齊人踢球,羽毛球只需兩人便可以玩。「兩個人最好嘅運動就係羽毛球,簡單嘛!你唔會同個女朋友玩健身㗎嘛。」
寓打波於拍拖
雖然兩人都表示羽毛球十分適合兩個人去玩,但他們同樣喜歡約埋一大班人打羽毛球,與眾同樂。黎諾懿更曾瘋狂找教練,每星期打足4、5日,「以前就係鄭伊健同蒙嘉慧兩個啦,馬浚偉都成日見到,佢都打得好癲㗎,塊拍有埋磅數。鄭伊健而家唔係好打,我先踢爆佢,佢好犀利㗎,左右拍都可以同時間打。好聽啲就左右開弓,唔好聽就冇樣精啦,哈哈。」
張達倫就大爆莊思明拍住拖打羽毛球,「我試過同《愛.回家》嗰班打,莊思明去到拍拖嘅啫,打兩下就話『好攰呀,我唔執波呀!』跟住楊明就會幫佢執波囉。但係開心嘅,有個地方畀佢哋拍吓拖仔,唔使成日都咁高調。」
清楚了解對手
不少人都視羽毛球是優閒運動,但「工欲善其事,必先利其器」,要打得好除了不斷練習外,器材都是重要的一環。黎諾懿指雖然最貴未必是最好,但貴的器材亦有其好處。「例如球拍呢,愈貴真係有佢個用處喺度㗎,纖維愈軟用力就愈少。買得貴咗起碼有個積極性呀,唔會打兩下就放低。」
有了器材,自然需要人腳,問到兩位最怕遇到甚麼對手,張達倫就稱最怕技術太好的人。「因為我技術太差,所以我惟有不斷跑,跑到死為止㗎咋。」不過,黎諾懿就說回一句公道話,「打羽毛球多數得兩種嘅啫,一係諗住出身汗嬉戲嘅,一係就認真練技術嘅,最緊要知你嘅對手係咩人囉。」百貨應百客,果然高招!

撰文:林洋 攝影:Allen