副刊

2018年12月20日

2017/03/13 (週一) 12:00上午

美食旅客大茶飯 港產點心2.0圖鑑

有一種美,在自然裏。有一種美,在餐桌上。
小巧一隻餃、趣妙半口酥。精緻一條卷、細膩兩片糕。
如翠石、像碧玉、似琉璃、仿珍綢。點心,由傳統手工1.0,到今日造型妙絕的2.0一直在進化,一直在美化。
看在眼內、吃進口裏,吞到肚中,回到心上。化成一種美,變成一幅圖,生生不息,滋養心靈。

也文也武 龍麵館
開喺中環心臟,門面也文也武。大堂一條大金龍,門柄摸到雙截棍,仲有一列醒獅頭、大鑼鼓、刀槍劍戟,十足寶芝林一樣。店面呃鬼佬,菜式卻冇欺場。賣新派中菜,主打蘭州拉麵,又有北京填鴨,卻爆紅創意點心。總廚Winson Yip,33歲,中華廚藝學院畢業,做過迪士尼酒店、沙田18,年前在唐宮小聚憑一道冬菇包響朵,之後過檔飲茶,大玩嘔奶包等創意點心。夠年輕、多諗頭,有功夫,難怪佢喺度也文也武啦!
龍麵館
地址:中環德輔道中 68 號萬宜大廈萬宜廊地下 G04 號舖
電話:2561 6688

粗幼兼備 李好味
又玩粗口諧音,店舖堆砌懷舊感情。
兩層的店,樓下酒吧似舊戲院,樓上餐廳似大牌檔。手寫餐牌,港式舊物,粗中見幼細。餐飲及營運總監 Joe Lee,拍住總廚Max Lee,賣港式街頭菜。港式小食、主菜、煲仔飯及甜點都有。粗菜細做,滷水小食用伊比利亞豬耳,點心八爪魚係西班牙八爪魚,咩都最緊要好玩!係百分百地道香港精神。
李好味
地址:中環擺花街8號地下及1樓
電話:2896 7688

飛甩老土 唐宮小聚
唓!大陸嘢!大陸嘢真係好娘!大陸無好嘢!來自大陸品牌的唐宮小聚,朕大陸「除」都除得幾徹底,14年於中環開店,憑着像真冬菇包跑出,打響名堂。最近更於尖沙咀開分店,繼續大玩摩登點心。
尖沙咀店地方更闊落,面積達6,000呎,設計裝修依舊接地氣,靠近門口照舊擺張乒乓球枱作餐,不過色調就轉咗淺色仿大理石,更Young,更啱港仔港女口味。點心類別更創新,更多元化,部分更是尖沙咀店限定。至於廚房班底,很多都是由中環店調過來,食物質素穩定。
唐宮小聚
地址:尖沙咀廣東道 30 號新港中心 3 樓 303 號舖
電話:3168 1362 / 3168 1363
營業時間:星期一至日
11:30am-4:30pm,6pm-10pm

花樣年華 老爺點心
一趟鐵閘,一幅喜鵲牆紙,幾盞雀籠吊燈,花瓷枱上放了印有魚蝦蟹公雞圖案嘅餐具,窗框上亦有人手製嘅「老爺」字樣,場景好似十足花樣年華嘅舊香港。你以為老爺一定係賣一盅兩件傳統點心。咁諗就錯!佢哋嘅食物一啲都唔老派。
主打點心有二、 三十款,全部由自來酒店點心師傳明哥負責,手工紮實,造型同味道更花盡心思,諗到將鹹水角變成紅蘿蔔,放入花盆內,加埋蘸上竹炭粉的炸排骨扮泥,極有創意。餐廳有一排高身椅,負責人Michael話家陣食點心唔只配茶,仲流行配啤酒、Cocktail,附近上班族中午過嚟食蒸飯做Lunch,放工就會過嚟叫幾個點心,飲杯啤酒Happy Hour。
老爺點心
地址:灣仔蘭杜街4號
電話:2328 8938
營業時間:星期日至四11am-10pm;
星期五至六11am-1am

撰文:譚偉健、鍾瑞華、姚可意 攝影:陳榮輝、何韋程、林霖、吳韻怡