副刊

2018年11月18日

2018/11/09 (週五) 12:00上午

細味濃情 李錦聯

「成個行業都畀你搞彎晒喇!」這句說話不單止是任達華的經典台詞之一,相信也是李錦聯的內心獨白。
一直以來,城中不少名廚、藝人開高端食肆,偏偏於師奶、OL界紅足廿多年的「TVB 廚神」李錦聯,明明煮得一手好菜,卻選擇於去年5月投資過百萬,與友人合資在佐敦開設一間超貼地的海鮮酒家「嘉彩漁村」。眼見飲食業個個搵銀至上,李錦聯也不禁搖搖頭,大嘆時下歪風太厲害,他語重心長地說:「大家真係想有個好嘅飲食造詣,一定要向住賓至如歸。」所以賺錢其次,最緊要客人食得開心,自己又可以「煮」出成就感。

撰文:黎寶倫|攝影:ChaseK
唔講唔知,原來「Ben師傅」李錦聯讀飲食管理出身,畢業後便開始為餐廳撰寫食評、為廚藝大賽擔任評判,90年初,他又獲無綫賞識於婦女節目《都市閒情》中的烹飪環節「今晚食乜餸」擔任固定廚師,直至16年底才宣告離開無綫。所以基本上,Ben師傅從未經歷傳統「學徒制」,亦未奪任何廚師獎項,不過「英雄莫問出處」,其廚技早已獲大眾認同,名利雙收。
食的堅持
在佐敦開設嘉彩漁村前,Ben師傅開過調味工場及大賣「李錦雞」,後來又與人投資燒臘店,惜最終跟合夥人意見不合才各走各路。直到早前,在機緣巧合下認識到嘉彩漁村的老闆梁先生,得悉屯門三聖邨本店決定搬出市區,於是在朋友的極力支持下,促成了今次合作,「當然選擇合夥人好重要,呢次我哋嘅合夥人都識咗好耐,翻查佢哋嘅歷史,佢哋做嘢手法都幾正當,係值得大家合作,同埋佢哋喺點心、燒味方面非常出色,佢哋堅持用新鮮材料、自家製作,好似點心都係喺舖面自己做。你知依家競爭都係鬥價錢,好多時忘記咗個品質,掛住搵錢,我覺得嘉彩漁村喺呢方面都有佢哋做嘢嘅方針,同我對飲食嘅堅持都有相同嘅地方。」
訪問當日,即使午後仍有不少食客光顧,如此旺場,Ben師傅卻表示無意開分店,「因為搵夠囉!」他哈哈大笑道,然後認真地說:「其實我哋係想將食同大家分享,如果成日將佢變成一種搵錢工具就會好唔開心。」
家的感覺
對於Ben師傅來說,「食」不單止是味覺上的享受,吃的更是一份「情」,「有點我要強調就係,好多食肆都係集團式,佢哋嘅人情味唔係咁濃厚,但嘉彩漁村只有一間,別無分店,於是佢哋同客人關係好密切,客人過時過節都會出嚟探吓佢哋。」
見餐牌價錢非常貼地,很好奇Ben師傅為何不利用名氣走高端價格,賺多幾倍?他即收起搞笑本色:「其實食嘅最高境界唔係食,係個感覺同親和力。好簡單,你返屋企食飯會唔會餐餐都咁好食呀?唔係㗎,點解要返去食呢?其實係一種感覺,我奉勸大家4隻字『賓至如歸』,好可惜依家飲食業個個都係錢銀至上,不斷整新嘢又平價又搞放題,我覺得呢啲係歪風!飲食最高境界係賓至如歸,所以歐洲好多好出名嘅餐廳都係得5、6張枱,好多餐廳都叫Maison(屋企)。我覺得依家呢個歪風實在太厲害,大家真係想有個好嘅飲食造詣,一定要向住賓至如歸。」並謂中菜的意念是聚人、聚氣,是攞食客的心而非攞錢!
淡出電視
拍攝期間,Ben師傅又即席炮製一道「海魚湯雞煲翅」,鏡頭前他亦一如以往,表現出專業及口齒伶俐的一面。原以為他很享受幕前工作,但Ben師傅否認道:「其實我對幕前興趣不大!」甚至揚言不考慮再參與電視節目演出,皆因實在太辛苦、太多掣肘,「依家喺電視煮餸要賣嘢,乜都要賣,連笑都要賣埋!」他說。
相信觀眾們最嚮往看他與安德尊(大王)互窒鬥氣,無奈16年拍竣飲食節目《區區開伙》後,令Ben師傅覺得意興闌珊,最終在同年12月離巢,「大王個格唔係幾好、詞風尖銳,但撞到我呢啲都唔係善男信女,所以我哋成日互窒,無啦啦就做咗咁嘅火花出嚟,啲人覺得好得意,但就死火嘞,呢樣咁得意、自然嘅嘢,公司要變成一種商品,要做成固有嘅嘢就梗係唔得啦,最辛苦係要諗好多爛Gag,有時太爛出唔到街,有人要孭飛㗎嘛,後來咪覺得冇癮囉。」現時將心機投放在酒家外,他透露稍後會推出網上平台「Ben哥廚房」,提供自家食品、廚具、煮食教學等一站式服務。

嘉彩漁村
地址:佐敦彌敦道378號彌敦酒店1樓
電話:2450 6333
營業時間:星期一至日10:00 – 23:00