娛樂

2017年8月21日

2017/06/19 (週一) 12:00上午

百無禁忌 主演新劇終出街 謝賢:幾擔心睇唔到

無綫新劇《賭城群英會》播出日期一拖再拖,終於排到期重見天日,今日首播。一班演員謝賢、劉兆銘與陳百祥等昨日出席該劇的造勢大會,現年80歲的謝賢笑稱:「我幾擔心睇唔到套劇播出呀!」陳百祥即指對方有排捱。

謝賢(四哥)、劉兆銘、陳百祥(阿叻)、陳法蓉、高海寧及黃浩然等昨日出席新劇《賭城群英會》造勢大會,身在內地的佘詩曼與馬國明因工作未能現身,但也有拍片支持。四哥事前講明唔接受訪問,不過與阿叻及劉兆銘在台上傾偈時則談笑風生,已有35年冇拍過無綫劇的四哥,指劇集完成多時尚未出街,笑言:「終於排到期播,我幾擔心睇唔到套劇播出呀!」身旁的阿叻聞言即說:「定啲嚟,你有排捱,跟住就拍電影。」四哥又投訴拍攝時經常遭阿叻整蠱。
阿叻稱小時候已經睇四哥主演的《千王之王》,冇諗過多年後能有機會跟對方及劉兆銘合作,仲話自己以往靠樣搵食,點知今次在劇中卻大賣內涵,阿叻透露:「有一場悲情戲,連導演都睇到喊,搞到我自己都嚇親。」至於劉兆銘亦笑稱自己從小睇四哥演出,冇諗過「長大」後能跟對方演對手戲,還自爆:「佢話我咁多年都冇變,行又慢,講嘢又慢,攞隻啤牌都慢,死都死得慢喎!」惹來全場發笑!