娛樂

2017年1月20日

2017/01/12 (週四) 12:05上午

疑似有喜 富太孫慧雪 肚凸凸尖咀掃平衫

「宅男女神」孫慧雪去年正式封盤,下嫁拍拖4年的圈外富二代男友羅天彥(Edwin),不過嫁了個富貴老公的阿雪卻依然慳家,早前仲肚凸凸與女友人到尖沙咀平民商場利時買衫,被問到疑似有喜,阿雪欲言又止,只係話有好消息就會公布,係咪怕BB 小器呢?

早年阿雪曾在利時開過服裝店做老闆娘,可能對該地點情有獨鍾,榮升富太後,冇去中環名店掃貨,仍然去該區的平民店舖買衫,不足一小時,阿雪話咁快就揀好一大袋衫,埋單都唔使過千,這個老婆認真抵娶。 當日所見現年34歲的阿雪依然童心未泯,孭住個掛有熊仔吊飾的背囊,雖然得天獨厚的她擁有凍齡童顏,不過出完寫真、結埋婚就似乎不顧身型,肚凸凸的她孕味甚濃。
其實早前阿雪和老公均揚言想生B,她亦一直被傳懷孕,本報事後致電給她,求證陀B傳聞時,阿雪欲言又止說:「唔⋯⋯總之有就會公布啦。(依家晚晚不設防?)好私人呀呢條問題。」阿雪又指最近工作很忙,要宣傳新戲《我要發達》,她謂:「新年好多嘢做,飯都唔得閒煮,蜜月都要遲啲先,睇吓之後大家得唔得閒補返,希望過幾個月去到啦。」