娛樂

2019年3月19日

2019/02/21 (週四) 12:00上午

湯鎮業 高手過招

現年60歲的湯鎮業在80年代是「無綫五虎將」之一,曾拍過不少經典劇集。現時發展重心雖轉至國內,但近年都有重返無綫拍劇,今次他在新劇中《荷里活有個大老千》出演「奸到出汁」的角色,更與一眾好戲之人高手過招,大過「戲癮」!

採訪:黎寶倫|撰文:黃寶華|攝影:ChaseK

再次回歸無綫拍攝新劇,湯鎮業(湯哥)透露劇中的角色正是延續電影《追龍》的顏童,「之前拍《追龍》係做顏童嗰個角色,搵我嗰陣話呢個探長個角色唔使點做,照番電影版個顏童咁做 。」角色變動不大,但湯哥為令觀眾有新鮮感,在演出上加入不少自己的意見。
要震撼觀眾
劇集中華探長文雄一角,予人很奸猾的感覺,但他指這個角色亦有柔情的一面,「個感覺就好奸,但其實嗰個年代就係咁,嗰個年代探長係貪污㗎嘛,但有個好處就係本身個人霸氣,但對老婆好好嘅,就算搶咗張慧儀返嚟,但對佢都好好㗎,後尾整死佢,因為覺得佢唔忠心!因為太愛佢,所以先整死佢。」
劇中有不少場次都是湯哥的創作,「有好多場次都係自己去安排,例如點樣去殺張慧儀嗰場戲,都拍得幾激,睇落去幾殘忍,幾血腥。會諗啲新方法,好似放個頭喺地下度夾佢,個感覺好震撼㗎嘛,抱佢擺落去,好唔捨得咁樣去搵道門夾佢,一路撞一路將自己感情發揮,我諗電視上都未出過,好暴力㗎出嚟個感覺。」他更表示「整跛」鄭則仕的一幕很難忘,「開頭去打麻將,整跛佢,我見到有個煙灰缸,攞個好大嘅煙灰缸『鏗』落去,『鏗』佢隻手,嗰次亦都好暴力,觀眾睇落去都會覺得好殘忍嗰種感覺,但好嘅就覺得出嚟有啲衝擊。」
讚港新人受教
在國內發展已有一段時間,湯哥坦言回港拍劇後,感受到香港拍劇掣肘較多,「國內嗰種拍法係好電影感,我初初返嚟TVB拍《梟雄》,係3機製作。我同導演好熟,佢都係喺內地拍好多劇,我話咁樣做法好落後。國內嘅製作好大,會單機或兩部機同時拍,3機On Air 嗰啲好傳統冇電影感。」對於現時香港影視不如以往,湯哥直言感到好心噏,「嗰時香港電影係亞洲最好,包括韓國都睇港產片!點解依家嘅韓劇成個亞洲嘅人都睇,因為國家支持呢個工業,咁咪變咗全民皆影視,娛樂可以帶動社會整個經濟。其實香港以前叻人好多,依家內地幕後好多都係香港人,但慢慢國內人學嘅嘢多咗,學咗香港啲嘢,慢慢就唔需要你,咁又覺得幾閉翳。」
雖然感到心噏,但湯哥都大讚劇集中的新人虛心受教,又指在國內教新人演技,別人「睬你都傻」,會認為「你憑咩教我」。湯哥更試過用廣東話拍戲,有內地演員不接戲的情況,「我哋喺內地初初拍嘅時候係用廣東話,10幾年前佢會話,『湯老師,沒關係你講廣東話,我們會聽 。』依家你講廣東話唔得㗎!同佢哋做對手戲,跟住佢會唔接你啲戲。導演會問佢,你做咩唔接對白?佢會話我聽唔明佢講咩嘢。我唔知佢係故意定係咩嘢喇!咁咪要習慣囉。」湯哥指就算自己的國語有多爛,都需要去尊重別人,「因為以前人哋要就你,但依家市場唔喺你嗰度,你過人哋度『搵食』,你咪要順住佢哋囉。」說時帶點無奈,卻又是不爭的事實!