娛樂

2018年1月16日

2018/01/12 (週五) 12:00上午

比較 算甚麼 衛詩

談衛詩,難免會提到其孖生胞姊衛蘭。
這對樂壇真“Twins”,由細到大一直活在比較中,除了樣貌相似外,就連事業都選在同一行發展。不過胞姊好像總較幸運,擁有耳熟能詳的歌曲,雖然偶有被嘲身型如「電單車」的新聞,但最少名字並未讓聽眾遺忘 ;可是衛詩出道多年,除了令她跌落谷底的負面新聞,或被當成是別人的陪襯品,總是脫不掉衛蘭的影子。雖然如此,不過衛詩從不怕被比較兼欣然接受,並未因此而放棄自己喜愛的工作,為屬於她的音樂路默默耕耘!

撰文:黎永樂 攝影:David
髮型:Jamie Lee @HAiR
化妝:Marsha @江中平化妝室
服裝:5cm
場地:Add Some Thai Restaurant
鳴謝:Barry@J&B Ent.

出道了12年的衛詩(Jill)最近到底在忙甚麼?「啱啱推出咗新歌《缺氧》,依家就幫首歌做宣傳,但係出咗呢首歌之前,都有同家姐返內地做巡迴音樂會。」《缺氧》是一首有關愛情的歌曲,由衛詩上一首歌《刺青》的班底製作,靈感來自衛詩的初戀以及經典愛情電影中男女主角的深刻場景。「中學嘅時候鍾意咗一個男仔,佢問我拎電話,嗰一刻個心真係有缺氧嘅感覺。」說時,像打開了Jill情竇初開的少女回憶。

接受不同意見
除了愛情,家人對於Jill來說亦相當重要,尤其胞姊衛蘭(Janice),除了一齊生活,當她經歷人生的高低起跌時,Janice總會陪伴再側,力撐自己到底,對於Jill的新歌更有讚無彈,「佢好鍾意呀!話我唱得好好,同埋佢都好鍾意R & B,家姐話佢首《天敵》嘅節奏同我首歌有啲似呀!又係好Groove。」Jill已經對「與姐姐比較」這個話題產生抗體,反正她認為人天生出來就會比較,是一種Human Nature。「由BB開始已經比較,即使係屋企人都會!比較邊個讀書叻啲,比較邊個瘦啲,邊個靚啲,乜嘢都有;我哋兩個又喺呢行唱歌,大家把聲都差唔多似,就連個樣都似,所以我哋都慣咗。」
上YouTube看網友Comment,歌迷又再比較,不過就與Jill呈相反意見,覺得這對“Twins”的聲線有好大分別,仔細聽其實兩人一點都不似。「都係嘅,我覺得家姐把聲係溫柔啲嘅,我嗰把聲比較大聲啲係咪?哈哈!但係我平時都唔會睇YouTube嗰啲Comment㗎!一來我唔識睇,二來我覺得人係會有好同唔好嘅意見,最緊要自己鍾意同埋自己做得好就OK!」

心繫廣東歌
12年歌手夢已過,衛詩眼中的香港樂壇變了不少,「我諗係因為Social Media,依家好多人喺網上度聽音樂,之前好開心做一隻碟,但係依家係逐個Single出。」以前香港歌手有不少商場騷和Event,今時今日已經被不少來自亞洲各地的過江藝人「搶生意」,特別是火紅的韓國歌手們,不過Jill沒有眼紅,反而十分欣賞,「我覺得佢哋好努力,佢哋真係每一日都好畀心機,好辛苦唱幾個鐘跳幾個鐘,好明顯睇到佢哋優勢嘅地方。」
Jill早前去了《Clockenflap》睇騷,她十分欣賞韓國歌手DEAN和來自印度的樂隊TINARIWEN,提議她不妨唱印度歌配廣東歌詞,頓時令Jill捧腹大笑,「打印度市場?好提議,最緊要搵啱團隊。」自從簽約華納後,令她接觸到不少國際音樂人,亦有機會到韓國錄音,問Jill想不想食住個勢唱韓文歌,她坦言:「始終香港都係我屋企嚟,喺呢度出世,我會想廣東歌好似依家K-Pop咁,差唔多受歡迎,唔好畀廣東歌文化好似依家咁靜,我想香港啲藝人會出多啲好嘅音樂畀大家聽。」擁有菲韓血統的Jill,雖然是半個「鬼妹仔」,不過亦懂得甚麼叫飲水思源,實屬難得!