娛樂

2019年1月16日

2016/11/04 (週五) 12:00上午

樂在其中 彭秀慧湯駿業

湯駿業(Ah Dee)03年與邵美君、梁祖堯創辦風車草劇團,最近他們為新作《北極光之戀》物色一位女演員,Ah Dee提出要求:「要畀到愛情感覺、感動到觀眾、有自己睇法,同埋對關係有體會。」曾以自編自導自演的獨腳戲“29+1”深受觀眾喜愛的彭秀慧,絕對是不二之選。

專訪開始時,Ah Dee笑着稱讚彭秀慧(Kearen):「靚啦、身材好啦、Charm啦、殺死人啦!」哄得女方開懷大笑。但其實不需要討好或說服,Kearen早對是次演出「飯應」,「第一因為好朋友啦,成日合作,知道一定好好玩;第二因為我鍾意咁少人嘅製作,幾個人一齊熬個戲出嚟,個過程係最好玩,我好嚮往呢啲相處;第三就係睇完劇本覺得好好玩,我哋要做好多角色。」
Ah Dee認為《北》劇精采的地方,在於帶點夢幻地表現出愛情的幽默和痛楚。談到海報上的宣傳語句「要放下甚麼,才可以抱着你」,他坦言認同,「兩個人太自我嘅話,做朋友可能好開心,但做情侶嗰個包容同接納,係要放低成見、尊嚴、過去,先可以拎起對方可愛或者唔可愛之處。」而Kearen就想起一個人走過千山萬水尋找情人的畫面,定是不惜放下一切去擁抱對方。想不到訪問也充滿戲味!
忽然做導演
排劇前,Kearen忙於把舞台劇“29+1”搬上大銀幕,「好似我一直都經營一間雲吞麵店,我一路希望所有嘢都係自己整,突然有人話:『你嚟我舖頭煮畀人食啦』。我去到,廚房入面有好多人,爐具係新嘅。我想攞隻鍋,然後有人話:『唔使!叫人去攞啦!』」原來首要應付的是各個崗位的人,還要適應以往獨腳戲未遇過的規矩,對她而言是樂趣也是挑戰,只求盡力而不後悔。
電影版由周秀娜及鄭欣宜主演,Kearen形容是放低的過程,「我拎住呢兩個角色咁耐,咁有血肉,然後要畀新嘅人入嚟,我都要放低對角色100%嘅執着,接受演員畀入嚟嘅嘢。」周秀娜曾兩度入場欣賞“29+1”,對故事有着深厚感情,而欣宜跟Kearen同樣於拍攝前便已認識,三人能夠互相信任、明白、坦誠地溝通,實在難得。
非一般歌手
Ah Dee同樣有衝出舞台,更由獨立歌手轉為簽約唱片公司,「我同普通歌手有少少唔同,我諗到Idea先會做音樂作品。」因為舞台劇,他不用擔心交租、開飯,更不用擔心歌手的收入微薄,感到開心和滿足就能撐下去,「我都會諗,會唔會無啦啦爆一隻歌,或者好受歡迎?呢樣嘢梗係想啦,但又唔會非做到不可。」他不諱言過了亂作夢的階段,現在着重的是有人喜歡,加上有機會做下一次。
遇上每項工作,Ah Dee總會撫心自問是否感到有趣。就像早前公司請他為陳柏宇做音樂Project,本來他沒靈感並沒有答允,但後來靈機一觸,二人相約聊天以索取「燃料」,最後完成微電影《告別の前》及《告別の後。光影音樂劇場》。近來Ah Dee更擔任對方演唱會的創作總監,與創作團隊討論流程跟演出元素,能夠樂在其中,他深感幸運。

撰文:Janice|攝影:Eddy|彭秀慧化妝:Tricia Siu
湯駿業部分服裝:University of Oxford Collection by bauhaus